रविन्द्र मिश्रलाई छुटाउन सडकमा ओर्लिने तयारी
तीनकुने प्रकरणमा पक्राउ परेका राष्ट्रिय प्रजातन्त्र पार्टी (राप्रपा)का वरिष्ठ उपाध्यक्ष रविन्द्र मिश्रलाई छुटाउन 'राजसंस्था पुनर्स्थापनाका लागि संयुक्त जनआन्दोलन समिति' ले सरकारलाई दबाब दिने भएको छ ।
मिश्रको रिहाईका लागि सडक संघर्ष आवश्यक पर्ने निष्कर्षसहित आन्दोलनका कार्यक्रम र आगामी रणनीति तय गर्न समितिका संयोजक नवराज सुवेदीले बैठक डाकेका छन् । आज दिउँसो १ बजे सुकेधारस्थित नवदुर्गा पार्टी प्यालेसमा बस्नेगरी उनले बैठक बोलाएका हुन् ।
राजसंस्था पुर्नस्थापनाको एजेण्डासहित चैत ४ गते गठन भएको समितिका सदस्य सचिव मिश्र चैत १५ गतेदेखि काठमाडौँ प्रहरी परिसरको हिरासतमा छन् । आन्दोलनका जनकमाण्डर तोकिएका दुर्गा प्रसाई समूहले आयोजना गरेको प्रदर्शनमा भीड उक्साएर हिँसात्मक घटना घटाएको आरोपमा उनी सोही दिन साँझ पक्राउ परेका थिए ।
उनीसँगै समातिएका राप्रपाका महामन्त्री धवलशमशेर राणा भने हाजिर जमानीमा रिहा भइसकेका छन् । आज बस्न लागेको जनआन्दोलन समितिको बैठकले मिश्रलाई रिहा गराउन सरकारलाई दबाब दिने योजना बनाउन लागेको बताइन्छ ।
हिरासतभित्र रहेका मिश्रले आफूलाई रिहा गराउन पार्टी (राप्रपा)ले कुनै चासो नदेखाएको गुनासो पोखिरहँदा सुवेदी नेतृत्वको समिति नै कस्सिन लागेको हो ।
बैठकमा समितिका सल्लाहकार डा. जगमान गुरुङले आगामी संघर्षको बारेमा ब्रिफिङ गर्ने बताइएको छ ।
टिप्पणीहरू