रेशम चौधरीलाई आजै जेल हाल्नुपर्थ्यो ?

नागरिक उन्मुक्ति पार्टीका संरक्षक रेशम चौधरी दिउँसो करिब १२ बजेतिर जनमत पार्टीसँग एकता घोषणा कार्यक्रमको लागि कमलादीस्थित नेपाल प्रज्ञा प्रतिष्ठानमा पुगेका थिए । कार्यक्रमका लागि हल बुकिङ नभएको र कार्यकर्ता बाहिरै रोकिएको अवस्थामा उनी एकाएक प्रहरीको घेरामा परे । 

चौधरीलाई समात्न प्रज्ञा परिसरमा सादा पोशाकका ७ जना सुरक्षाकर्मी बिहानैदेखि परिचालित थिए । त्यसो त, प्रहरीले हिजो-अस्ति वा भोलि-पर्सि पनि पक्राउ गर्न सक्थ्यो । तर पार्टी एकता घोषणा कार्यक्रमकै दिन पारेर समात्नु योजनावद्ध थियो वा संयोग ? प्रहरी स्रोत भन्छ, ‘यो संयोग मात्रै हो, हामीले सर्वोच्चको आदेश कार्यान्वयनमा सहयोग मात्रै गरेका हौँ ।’

पार्टी एकता घोषणा कार्यक्रमकै दिन पारेर समात्नु योजनावद्ध थियो वा संयोग ? प्रहरी स्रोत भन्छ, ‘यो संयोग मात्रै हो, हामीले सर्वोच्चको आदेश कार्यान्वयनमा सहयोग मात्रै गरेका हौँ ।’

एक बालक र आठ सुरक्षाकर्मीको ज्यान जानेगरी २०७२ भदौ ७ गते भएको टिकापुर हत्याकाण्डमा चौधरीलाई मुख्य दोषी ठहर गर्दै सर्वोच्च अदालतले जन्मकैदको सजाय सुनाएको थियो । पाँच वर्ष तीन महिना कैद भुक्तान गरिसकेका उनी दुई वर्षअघि गणतन्त्र दिवसको अवसरमा आममाफी पाएर छुटेका थिए । 

तत्कालीन सरकारको सिफारिसमा राष्ट्रपति रामचन्द्र पौडेलले ०८० जेठ १५ गते आममाफी दिएपछि चौधरी रिहा भएका हुन् । तर,भोलिपल्टै पीडित शारदा कडायतले आममाफीविरुद्ध सर्वोच्चमा रिट हालेकी थिइन् । घटनामा ज्यान गुमाएका इन्सपेक्टर केशव बोहराकी श्रीमती शारदाले चौधरीलाई जेलमै राख्नुपर्ने मागसहित रिट दर्ता गराएकी थिइन् ।

अब चौधरीले बाँकी कैद (१४ वर्ष ९ महिना) भुक्तान गर्नेछन् । 

सोही रिटमा सर्वोच्चले अन्तिम फैसला नहुँदासम्म चौधरीलाई कारागारमै राख्न आदेश दिएको फैसला कार्यान्वयन निर्देशनालयले जनाएको छ । अदालतको फैसला कार्यान्वयनका लागि प्रहरीको सहयोगमा चौधरीलाई डिल्लीबजार कारागार पठाइएको निर्देशनालयका सूचना अधिकारी नेत्रहरि पौडेलले जानकारी दिए । 

उनका अनुसार अब चौधरीले बाँकी कैद (१४ वर्ष ९ महिना) भुक्तान गर्नेछन् । यद्यपि,सर्वोच्चको अन्तिम फैसलाबाटै उनको कैद सजाय तय हुने पौडेल बताउँछन् ।

उता प्रहरीले पनि कानुनी प्रक्रिया पूरा गर्न चौधरीलाई नियन्त्रणमा लिएर कारागार पठाइएको बताएको छ । ‘पार्टी एकताको कुरा हामीलाई थाहा भएन, अदालतको आदेश कार्यान्वयन मात्र गरेका हौँ’, जिल्ला प्रहरी परिसर काठमाडौँले भनेको छ, ‘कानुनी प्रक्रियामै रहेर उहाँलाई नियन्त्रणमा लिइएको हो, अरु केही कारण छैन ।’