गुठी पीडितले आज घण्टीघरमा नारा लगाउने

विगत एक महिनादेखि काठमाडौँ केन्द्रित आन्दोलन गरिरहेका स्वर्गद्वारी गुठी पीडितहरु आज र्याली गर्दै राष्ट्रिय स्वतन्त्र पार्टी (रास्वपा) केन्द्रीय कार्यालय जाने भएका छन् । 

दाङ देउखुरीबाट काठमाडौँ आएर गौशालास्थित पशुपति धर्मशालामा बसेका र माघ २० गतेदेखि सडक संघर्ष गरिरहेका उनीहरु आफ्ना माग सुनाउन त्यहाँ जान लागेका हुन् । स्वर्गद्वारी गुठी पीडित मोही किसान संघर्ष समितिका सल्लाहकार भरतलाल चौधरीको नेतृत्वको टोली घण्टीघरका लागि निस्किसकेको छ । 

पशुपति धर्मशालाबाट नाराबाजीसहित निस्किएको टोली गौशाला, रातोपुल करिडोर, सेतोपुल, अनामनगर, बिजुलीबजार हुँदै माइतीघर आइपुग्ने छ । करिब सय जनाको संख्यामा रहेका उनीहरुमध्ये आधा माइतीघर मण्डलामा धर्ना बस्ने र समितिका उपाध्यक्ष बालकृष्ण चौधरीको नेतृत्वमा अरु प्रदर्शनकारी बनस्थली, चमतिस्थित रास्वपा मुख्यालय पुग्ने कार्यक्रम छ । 

स्वर्गद्वारी आश्रमको जग्गा मोहियानी हकअनुसार पाउनुपर्ने पीडितहरुले माग राख्दै आएका छन् । त्यसअनुसार कानुन बनाउन सरकार र सरोकारवालाहरुलाई बारम्बार आग्रह गरेपनि सुनुवाई नभएपछि आन्दोलनमा उत्रिनुपरेको संघर्ष समितिले जनाएको छ ।

सरोकारवालालाई खबरदारी गर्न पीडितहरुले अस्ति एमाले र हिजो माओवादी मुख्यालय पुगेर आफ्ना माग र मुद्दाबारे ध्यानाकर्षण गराएका थिए ।