अघिल्लो दिन ‘फर्स्ट लेडी’ को, भोलिपल्ट प्रधानमन्त्रीको पुस्तक आउँदै

प्रधानमन्त्री एवम् नेकपा एमालेका अध्यक्ष केपी शर्मा ओलीको औपचारिक शैक्षिक योग्यता निम्न माध्यमिक तहसम्म मात्रै हो । तर पनि उहाँले स्वःअध्ययनमा निकै रुची राखेको पाइन्छ । 

उमेरले ७३ वर्ष पुग्नुभएका प्रधानमन्त्री ओलीले उच्च शिक्षाको पाठ्यक्रम अध्ययन नगरे पनि अतिरिक्त ज्ञानवर्धकपुस्तकहरु प्रशस्त पढेको निकटस्थहरु बेलाबखत चर्चा गर्छन् । विभिन्न विश्वविद्यालयले उहाँलाई प्रदान गरेको मानार्थ विद्यावारिधीको उपाधीले त्यस्तो चर्चालाई थप बल पुर्याएको छ ।

तेह्रथुमको एउटा गाउँमा जन्मिनुभएका ओली कसरी यो मुलुकमा चौथो पटक प्रधानमन्त्री बन्नुभयो ? अब उहाँको जीवनीमा त्यो सबै समेटिने भएको छ । आगामी आइतबार ‘केपी शर्मा ओलीः सपना, संघर्ष र संकल्प’ पुस्तक विमोचन गर्न लागिएको छ ।

अल्मेकी पब्लिकेशनले बजारमा ल्याउन लागेको उक्त संस्मरण–जीवनीलाई गणेश पाण्डेले शब्दमा उतारेका हुन् । पत्रकार तथा वृत्तचित्र निर्माता/निर्देशक पाण्डे एमाले निकट प्रेस चौतारीमा आबद्ध छन् । प्रधानमन्त्री ओलीको ७४औँ जन्मदिनमा उक्त पुस्तकको विमोचन तय भएको प्रकाशन गृहले जनाएको छ । 

फागुन ११ गते बिहान ११ बजे प्रदर्शनीमार्गस्थित राष्ट्रिय सभामा आयोजना गर्न लागिएको विमोचन समारोहको प्रमुख अतिथिको रुपमा पूर्व राष्ट्रपति विद्यादेवी भण्डारीलाई निम्त्याइएको छ । कार्यक्रममा स्वयम् प्रधानमन्त्री वक्ताको रुपमा रहुनुहुने छ ।

उक्त पुस्तक विमोचन हुनुभन्दा एकदिन अघि उहाँकी पत्नी राधिका शाक्यको पुस्तक ‘करुणा’ प्रधानमन्त्रीले सार्वजनिक गर्ने कार्यक्रम छ । उक्त पुस्तकलाई पाणिनि प्रकाशनले बजारमा ल्याउन लागेको हो । राष्ट्रिय सभागृहमै आयोजना हुने उक्त कार्यक्रमको लागि निमन्त्रणासमेत बाँडिसकिएको छ ।

‘बितेका केही महिना मेरो समय पुस्तक लेख्ने काममा बित्यो’, शाक्यले भन्नुभएको छ, ‘जीवनमा बितेका दिनहरूको सम्झना, भोगाइहरुको समीक्षा र अनुभूतिलाई पुस्तकमा समेट्ने प्रयास गरेकी छु, कार्यक्रममा सहभागी हुन सबैलाई मेरो निम्तो छ ।’

‘फर्स्ट लेडी’ समेत रहनुभएकी शाक्यले यसअघि ‘मेरा अनुभूति’ संस्मरण बजारमा ल्याउनुभएको थियो । पुस्तकमा उहाँले प्रधानमन्त्री ओलीसँगको भेट, बिहे, राजनीतिक जीवनका उतारचढावलगायत विषयलाई समेट्नुभएको छ ।