विधि–विधान उल्लंघनमा अमेरिकामा बस्दै आएका नेपालीहरु अगाडि

अमेरिकाको सान फ्रान्सिस्कोस्थित नर्दन क्यालिफोर्नियामा रहेको नेपाली जनसम्पर्क समितिमा मनोनयन दर्ता प्रक्रियालाई लिएर गम्भीर विवाद उत्पन्न भएको छ ।

संस्थाको विधानमा स्पष्ट रूपमा कुनै पनि आपराधिक गतिविधि तथा गम्भीर अपराधमा संलग्न भई देशको कानुन उल्लङ्घन गर्ने व्यक्ति सदस्य तथा उम्मेदवार हुन अयोग्य हुने व्यवस्था छ । तर त्यस्ता आरोप लागेका केही व्यक्तिको उम्मेदवारी स्वीकृत गरिएपछि विवाद उत्कर्षमा पुगेको छ ।

विधानमा संगठनको उद्देश्यविपरीत कार्य गर्ने, विधान तथा सिद्धान्तको उल्लङ्घन गर्ने, साथै आपराधिक पृष्ठभूमि भएका व्यक्तिहरूलाई सदस्यता र उम्मेदवारी दिन नपाइने स्पष्ट प्रावधान छ। तर ती प्रावधानलाई बेवास्ता गर्दै निर्वाचन समितिले उम्मेदवारी दर्ता गराएपछि ाधारण सदस्यहरूबीच असन्तोष बढ्दै गएको बताइन्छ । 

निर्वाचन समिति विधि र विधानको पालना गराउने प्रमुख निकाय भए पनि व्यवहारमा भने समिति केवल ‘नाममै सीमित’ को अवस्था उत्पन्न भएको छ । विधानविपरीत उम्मेदवारी दर्ता गराएपछि निर्वाचन प्रक्रियाको निष्पक्षता, पारदर्शिता र विश्वसनीयतामाथि गम्भीर प्रश्नचिन्ह खडा गर्ने उनीहरूको तर्क छ ।

यसैबीच, सहसचिव पदमा मनोनयन दर्ता गरेका एक सदस्यले औपचारिक असहमति जनाएका छन्। उनले सहसचिव पदबाट आफ्नो नाम उम्मेदवारको सूचीबाट हटाउन निर्वाचन समितिलाई स्पष्ट अनुरोध गरिसेका छन् । उनका अनुसार निर्वाचन समितिले विधानमै नभएको पद सिर्जना गरी गरिएका कार्यहरू आपत्तिजनक तथा संगठनात्मक मर्यादाविपरीत हो ।

कुनै पनि सूचना सार्वजनिक गर्नुअघि पर्याप्त अध्ययन र तथ्यको पुष्टि गर्न निर्वाचन समिति तथा सम्बन्धित निकायलाई उनले आग्रहसमेत गरेका छन्।

पछिल्लो असहमति र विवादबीच च्याप्टर अधिवेशन स्थानीय शनिबार बिहान १० बजे सुरु हुँदैछ। नन्दप्रसाद न्यौपानेलाई साक्षी राखेर सदस्यहरूले यस विषयमा यथाशीघ्र छानबिन गरी विधानअनुसार उम्मेदवारी खारेज गर्नुपर्ने माग गरेको अवस्था छ । निर्वाचन समितिले आफ्नो जिम्मेवारी इमानदारीपूर्वक वहन नगरे संस्थाको आन्तरिक लोकतन्त्र, विश्वसनीयता र साखमा दीर्घकालीन असर पर्ने चिन्ता सदस्यहरूले व्यक्त गरेका छन्।