अन्तरीक्ष भन्ने,कुमारीपाटीमा हराउने

पाटन संयुक्त क्याम्पस (अंग्रेजी विभाग)का उपप्राध्यापक ढुण्डीराज निरौलाले अध्ययन बिदाको दुरुपयोग गरेर करोडौँ कमाएको चर्चा सेलाउन नपाउँदै अन्य दुई उपप्राध्यापक पनि उस्तै मेलोमेसोमा लागेको पाइएको छ । सोही क्याम्पसका उपप्राध्यापक द्वय लोकनाथ शर्मा र पूर्णज्योती शाक्यले विद्यावारिधि (पिएचडी) गर्ने भन्दै अध्ययन बिदाको दुरुपयोग गरेको खुलेको छ । 

भौतिकशास्त्र अध्यापन गर्ने उनीहरु ‘अन्तरिक्ष भौतिकशास्त्र’मा पिएचडी गर्ने भन्दै एक वर्षदेखि सरकारी अध्ययन बिदामा छन् । सामान्यतया त्रिभुवन विश्वविद्यालय,शिक्षक तथा कर्मचारी सेवासम्बन्धी नियम ०५०, परिच्छेद ५ अनुसार ‘अध्ययन बिदामा बस्दा विश्वविद्यालय वा अन्य सरकारी वा अर्धसरकारी वा गैरसरकारी क्षेत्रमा तलब वा अन्य सुविधा वा पारिश्रमिक लिई वा नलिई काम गर्न पाउँदैनन् ।’ तर उपप्राध्यापक द्वय शर्मा र शाक्यले भने ललितपुरको कुमारीपाटीस्थित मुनलाईट सेकेन्डरी स्कूल (मोलिस) कलेजमा अध्यापन गरिरहेका छन् । रोचक के भने, उनीहरुले उक्त कलेजमा लगानीसमेत गरेका छन् । कलेजको वेवसाईटमा उल्लेख गरिएको सञ्चालक समिति सदस्यको सूचीमा दुवै जनाको नाम र फोटो राखिएको छ । 

यसरी उपप्राध्यापकद्वय शर्मा र शाक्यले सरकारी तलब भत्तासहित बिदामा बसेर निजी कलेजमा अध्यापन गराइरहेको थाहा पाएपछि पाटन संयुक्त क्याम्पसकी सहायक प्रमुख सुविता वैद्य भन्छिन्, ‘यो त सरासर गलत हो, राज्यको सम्पत्ति दुरुपयोग भयो, कानुनी दुष्टिकोणले पनि त्यसो गर्न मिल्दैन ।’

उता उपप्राध्यापक शर्माले पनि आरोप स्वीकार गरेका छन् । एक वर्षदेखि अध्ययन बिदा दुरुपयोग गरिरहेको उनको स्वीकारोक्ति छ । ‘गर्न हुँदैनथ्यो, भइहाल्यो’, उनले जनआस्थासँग भने । अर्का उपप्राध्यापक शाक्यको धारणा पनि उस्तै छ । उनले भने, ‘दिउँसो पढाइरहेको छु, अब पिएचडीमा लाग्छु’ । दुवै जनाले अध्ययन बिदाको दुरुपयोग गरेको स्वीकार गरे पनि यसबीचमा लिएको तलबभत्ता सरकारलाई फिर्ता गर्नेसम्बन्धमा भने केही बोलेनन् । कानुनअनुसार अध्ययन बिदा अवधिमा लिएको तलबभत्ता १० प्रतिशत ब्याजसहित सरकारलाई फिर्ता गर्नुपर्ने प्रावधान छ । 

स्मरण रहोस्, अध्ययन बिदामा बसेर सेवामा नफर्किएका र निजी संस्थामा काम गरिरहेका कर्मचारीको खोजी गर्न त्रिविले पुस अन्तिम साता खोजविन समिति बनाएको थियो । डा. जीवन काफ्ले नेतृत्वको उक्त समितिलाई तीन महिनाको समय दिइएको छ । जनआस्थाले अध्ययन बिदा दुरुपयोग गरिरहेका उपप्राध्यापक ढुण्डीराज निरौलाको समाचार प्रकाशित गरेपछि त्रिविले त्यस्ता अन्य कर्मचारीको खोजी थालेको हो ।