राष्ट्रिय स्वतन्त्र पार्टी (रास्वपा)का सभापति तथा पूर्वगृहमन्त्री रवि लामिछाने थप चार दिन प्रहरी हिरासतमा रहने भएका छन् ।
पोखराको सूर्यदर्शन सहकारी संस्था ठगीका आरोपित उनीमाथि थप अनुसन्धान गर्न कास्की जिल्ला अदालतले प्रहरीलाई आज छैठौं पटक म्याद थपिदिएको हो । लामिछानेलाई थुनमा राख्न प्रहरीले १३ दिन मागेकोमा न्यायाधीश हिमलाल बेल्वासेले चार दिन मात्र दिएको बताइन्छ ।
अदालतले लामिछानेको स्वास्थ्य उपचारको प्रबन्ध मिलाउन पनि आदेश दिएको छ । हिरासतमा राख्ने क्रममा म्याद थप गरिएका व्यक्तिहरुको मानवअधिकार उल्लंघन हुने कार्य नगर्नु, नगराउनु भनी अदालतले जिल्ला प्रहरी कार्यालयको नाममा आदेश गरेको छ ।
कात्तिक २ गतेदेखि हिरासतमा रहेका लामिछानेविरुद्ध सहकारी ठगीसँगै सम्पत्ति शुद्धीकरण र संगठित अपराधमा पनि अनुसन्धान चलिरहेको छ । यसबीचमा उनीसँग सूर्यदर्शनसँगै बुटवलको सुप्रिम सहकारी, काठमाडौँको स्वर्णलक्ष्मी सहकारी र चितवनको सहारा चितवन सहकारीमा भएको ठगीबारे पनि बयान लिइएको छ । उता, वीरगञ्जको सानो पाइला सहकारीमा भएको ठगी सम्बन्धी उजुरीमा पनि प्रहरीले गत साता पक्राउ पुर्जी जारी गरेको छ ।
