राप्रपाले ०८४ अघि नै देशको नेतृत्व लिने दाबी

पूर्वपञ्चहरुको पार्टी राप्रपाका अध्यक्ष राजेन्द्रप्रसाद लिङदेनले ०८४ को निर्वाचनअघि नै राप्रपाले सरकारको नेतृत्व लिनसक्ने दाबी गरेका छन् ।

आज बिर्तामोड नगर अधिवेशनको उद्दघाटन समारोहलाई सम्बोधन गर्दै उनले राप्रपालाई बलियो बनाएर छिट्टै देशको नेतृत्व लिने बताएका हुन् । राप्रपालाई पर्खिने छुट नरहेको भन्दै लिङ्गदेनले भने, 'अब यो मुलुकको नेतृत्व राष्ट्रिय प्रजातन्त्र पार्टीले गर्नुपर्छ । पर्यो भने बीचमै, भएन भनेपनि ०८४ भन्दा त उता हामी जानै हुँदैन । ०८४ मा त राष्ट्रिय प्रजातन्त्र पार्टीले नेतृत्व गर्ने हो गर्ने हो ।' 

नेपाली काँग्रेस र एमाले मिलेर बनेको वर्तमान सरकारसँग नागरिक खुशी नरहेको बताउँदै उनले राप्रपालाई विकल्पको रुपमा स्थापित गर्नुपर्नेमा जोड दिए । प्रधानमन्त्री र मन्त्रीहरु चाहेको ठाउँमा जानसक्ने स्थितिसमेत अहिले नारेकाले उनीहरुको अलोकप्रियता पुष्टि हुने लिङ्गदेनको भनाई छ । 

'आज काँग्रेस, एमाले मिलेर बनेको सरकारको नेताहरु जनताको बीचमा जान सकिरहेका छैनन् । काँग्रेस र एमाले मिलेर सरकार बनाउँदा त प्रधानमन्त्री जहाँ गयो जनताले त्यहीँ मुर्दावाद भनिरहेका छन् । अब प्रधानमन्त्री, मन्त्रीहरुले आफूले चाहेको बेलामा, चाहेको ठाउँमा जानसक्ने परिस्थिति बनेको छैन भने देशले के खोजिरहेको छ, त्यो स्पष्ट छ', उनले भने । 

राप्रपाले आफ्नो शक्ति चिन्न नसकेकोमा लिङ्गदेनलेगुनासो समेत गरे ।