निजी क्षेत्र सम्मिलित नयाँ चरणको आर्थिक सुधार आवश्यकः अध्यक्ष ढकाल

नेपाल उद्योग वाणिज्य महासंघका अध्यक्ष चन्द्रप्रसाद ढकालले नयाँ चरणको आर्थिक सुधारका लागि पहल गरिरहेको बताएका छन् । नेपाल भ्रमणमा रहेका बंगलादेश, भुटान र नेपालका लागि अन्तर्राष्ट्रिय वित्त निगम (आइएफसी) का त्रीदेशीय प्रबन्धक मार्टिन होल्टम्यानसँग आज भएको भेटवार्तामा उनले उक्त धारणा राखेका हुन् ।

ढकालले नयाँ चरणको आर्थिक सुधारका लागि सरकारको नेतृत्व र विकास साझेदारसँग सहकार्यको आवश्यकता रहेको बताए । नेपाल प्राकृतिक स्रोतसाधनमा धनीसँगै युवा र गतिशील जनशक्ति भएको मुलुक रहेको उल्लेख गर्दै उनले यसलाई सदुपयोग गरेर आर्थिक वृद्धि गर्न सकिने जनाए । 

त्यस्तै, व्यापारिक वातावरणमा सुधार, लगानीप्रति आकर्षण गर्ने नीति तथा उद्यमशीलता प्रवद्र्धनमा विशेष ध्यान दिनुपर्नेमा उनको जोड छ । ढकालले नवप्रवर्तन, उद्यमशीलता विकास र दीगो आर्थिक वृद्धिलाई प्रवद्र्धन गर्ने वातावरण सिर्जना गर्न अन्तर्राष्ट्रिय वित्त निगमसँगको सहकार्य आवश्यक रहेको औंल्याए । 

होल्टम्यानले आइएफसी सँधै निजी क्षेत्रको विकासको साझेदार र विश्वभरको आर्थिक वृद्धि र दिगोपनलाई प्रवद्र्धन गर्न साझेदार रहेको बताए । उनले नेपालको विकासमा आइएफसी निरन्तर सहयोग र सहकार्य गर्ने प्रतिबद्धता समेत व्यक्त गरेका छन् । 

होल्टम्यानले नेपालमा दीगो आर्थिक विकासका लागि नेपाल उद्योग वाणिज्य महासंघसँग साझेदारी गर्न पाउँदा खुसी लागेको उल्लेख गरेका छन् । गत वर्ष आइएफसी र महासंघले संयुक्त रुपमा पहिलोपटक नेपालको अर्थतन्त्र र रोजगारीमा निजी क्षेत्रको भूमिका विषयक अध्ययन प्रतिवेदन सार्वजनिक गरेको थियो ।