अमेरिका पठाउने ठगी धन्दामा मातृका यादवका नाति पनि

माओवादी केन्द्रका नेता तथा पूर्वमन्त्री मातृका यादवका नाति सन्तुलन यादवले अमेरिका पठाउने नाममा ठगी धन्दा सञ्चालन गरेको आरोप छ । सन्तुलनले अमेरिकाको भिसा लगाइदिने नाममा ३२ लाख ५० हजार रूपैयाँ ठगेको भन्दै प्रहरीमा जाहेरी दर्ता भएको छ ।

पीडित युवती दिप्ती भट्टराईले नेता यादवका नाति सन्तुलनले अमेरिकाको भिसा लगाइदिने नाममा आफू र आफ्नो परिवारसँग पटकपटक गरेर ३२ लाख ५० हजार रुपैयाँ ठगेको प्रमाण काठमाडौं जिल्ला प्रहरी परिसर टेकूमा दर्ता गरेको जाहेरीमा उल्लेख गरेकी छन् ।

कीर्तिपुर नगरपालिका १, अमृतनगरकी दिप्तीले प्रहरीमा दिएको जाहेरीका आधारमा सिरहा, मिर्चैयाका गोविन्द साह पक्राउ परेका छन् । प्रहरीले उनीविरुद्ध काठमाडौं जिल्ला अदालतमा ठगी मुद्दा दर्ता गरेको छ भने सन्तुलन फरार छन् । सन्तुलन मातृकाकी छोरी सरिताका छोरा हुन् । सरिताले मिर्चैया निवासी दिलिपकुमार साहसँग जनवादी विवाह गरेकी हुन् ।

सन्तुलन र दिप्ती ललितपुरको चाकुपाटस्थित ब्रिटिश मोडेल कलेजमा सँगै पढेका ब्याची हुन् । उनी आफूलाई माओवादी नेता मातृका यादवको नातिको रुपमा परिचय दिन रुचाउँथे । एउटै कलेजमा अध्ययन गरेका उनीहरूबीच प्रत्यक्ष कुराकानी र औपचारिक चिनजान भने नभएको बताइन्छ । कलेजमा देखादेख मात्र भएका उनीहरुबीच सामाजिक सञ्जाल फेसबुकमा चाँही कुराकानी भएको दिप्तीले जाहेरीमा उल्लेख गरेकी छन् ।

सोही क्रममा सन्तुलनले आफू अध्ययन भिसामा अमेरिका जान लागेको र जान चाहेमा दिप्तीलाई पनि हजुरबुवा मार्फत् पहल गरिदिने बताएको उल्लेख छ ।  अमेरिकी दूतावासमा हजुरबुबाले जागिर लगाइदिएका व्यक्तिले भिसा लगाउन पहल गरिदिने तर भिसा प्रोसेसका लागि पैसा लाग्ने बताएपछि दिप्तीले आँटेको प्रहरीको अनुसन्धानबाट खुलेको छ । 

स्टुडेन्ट भिसामा गएपछि ग्रिन कार्ड, त्यसपछि परिवारलाई अमेरिका लैजान पाइने प्रलोभनमा दिप्ती परेको देखिन्छ । भिसा नलागेमा भएको खर्च सबै फिर्ता हुने त्यतिबेला सन्तुलनको प्रतिबद्धता थियो ।

दिप्तीले अमेरिका जाने विषयमा घरसल्लाह गरिन् । मातृका यादवले नै भिसाका लागि पहल गरिदिने विश्वासमा दिप्तीका बुवा भानुभक्त भट्टराई छोरीलाई अमेरिका पठाउन राजी भएका थिए । भिसाका लागि सन्तुलनले भनेबमोजिम पटकपटक गरेर बैंक खाता, आईएमई र इसेवाबाट ३२ लाख ५० हजार रूपैयाँ उनीहरुले दिएको देखिएको छ ।

यसरी खुल्यो ठगीको भेद

अमेरिका जान भिसाको सबै प्रक्रिया सकिएकाले नयाँ दिल्लीस्थित अमेरिकी दूतावासमा अन्तर्वार्ताका लागि जानुपर्ने बताइयो । उक्त प्रयोजनका लागि सन्तुलनले दिप्तीलाई लिएर गत पुसमा दिल्ली हान्निए ।

आफूलाई प्रत्येक दिन नयाँ होटलमा राखिएको दिप्तीको भनाई छ । १६ औं दिनसम्म पनि अन्तर्वार्ताका लागि दूतावास नलगेपछि उनलाई शंका लागेको हो । दिप्तीका अनुसार त्यसपछि सन्तुलनले प्रोसेस सबै सकिएकाले दूतावास नजानुपर्ने भन्दै घर जान आग्रह गरे । काठमाडौं गएर अमेरिकाको तयारी थाल्न र १० दिनपछि अमेरिका उड्न किनमेलको लागि बताएका थिए । शंका उपशंकाबीच दिप्ती नेपाल फर्किइन तर सन्तुलन त्यसपछि सम्पर्कविहीन भए ।

१५ दिनअघि सामाजिक सञ्जालमा सम्पर्कमा आएका सन्तुलनले दिप्तीले भिसा अप्लाइको क्रममा दिएको शैक्षिक प्रमाणपत्रलगायतका कागज फिर्ता मागिन् ।  उल्टै उनले कागजपत्र फिर्ता चाहिए पुनः पैसा दिनुपर्ने शर्त राखेको दिप्तीको भनाई छ । ‘मेरा सबै ओरिजिनल डकुमेण्ट सन्तुलनलाई दिएको थिएँ, फिर्ता गर्न उल्टै पैसा मागिराछ ।’

बैंक खातावाल समातिए

आफू ठगिएको थाहा पाएपछि दिप्तीले प्रहरीमा जाहेरी दिएकी हुन् । उनको जाहेरीमा सन्तुलनले उपलब्ध गराएको मिर्चैयाका गोविन्द साहको सानिमा बैंकको खाता नम्बर १३३०११०००००४८५ मा आठ लाख रूपैयाँ दिप्तीका बुवा भानुभक्त भट्टराईले जम्मा गरिदिएको उल्लेख छ । सोही आधारमा प्रहरीले गोविन्दलाई पक्राउ गरेर काठमाडौं जिल्ला अदालतमा ठगि मुद्दा चलाएको हो ।

गोविन्दले सरकारी वकिलसँगको बयानमा सन्तुलनले भनेअनुसार खाता नम्बर उपलब्ध गराएको दाबी गरेका छन् । खातामा जम्मा भएको आठ लाख रूपैयाँ निकालेर सन्तुलनलाई दिएको जनाउँदै उनले भने, ‘के कामका लागि उक्त कारोबार भएको मलाई थाहा भएन ।’