बजेट निर्माणमा पञ्चायतकालीन सोच नहटेकोमा राजेन्द्रलक्ष्मीको गुनासो

राष्ट्रिय सभा सांसद राजेन्द्रलक्ष्मी गैरेले बजेट निर्माण प्रक्रिया पञ्चायतकालीन सोचबाट माथि उठ्न नसकेको टिप्पणी गरेकी छन् । संविधानले समावेशी सिद्धान्त अङ्गीकार गरेपनि वजेट भने परम्परागत बन्ने गरेको गुनासो गर्दै उनले यस्तो धारणा राखेकी हुन् । 

राष्ट्रिय सभाको आजको बैठकमा बोल्दै गैरेले लैंगिक समावेशी बजेट बनाउन अर्थमन्त्रीसँग आग्रहसमेत गरेकी छन् । विकासमा समानता ल्याएर संमृद्धि हासिल गर्न महिला, दलित, युवा तथा पछाडि परेका समुदाय केन्द्रित बजेट बनाउन सक्नुपर्ने उनको जोड छ । 

‘महिला, दलित, युवा, पछाडि परेको क्षेत्रको हिसावले हेर्दा हाम्रो लैंगिक बजेट कहाँ छ ? हामीले हाम्रो क्षेत्रका पछाडि परेका जनतालाई उकास्ने बजेट कुन शीर्षकमा छ ? हामीले देखेनौँ’, सांसद गैरेले भनिन्, ‘परम्परागत बजेट भयो । पञ्चायतकालमा जे गर्यौँ आज हाम्रो योजना बाँडफाँड शक्तिको आडमा जसले सक्छ उसले लैजाने खालको भयो । यस्तो खालको परिकल्पना हाम्रो संविधानले गरेको छैन ।’

विगतमा योजना बाँडफाँड शक्तिको आधारमा हुने गरेको जनाउँदै उनले यसपटक न्यायपूर्ण वितरण हुने विश्वाससमेत व्यक्त गरेकी छन् । ‘अबको बजेट आउँदा लैंगिक समावेशी बजेट आउनुपर्यो । जसले गर्दा पछाडि परेको क्षेत्र र भूगोललाई विकासमा समानता ल्याउन सक्छौँ । न्याय दिलाउन सक्छौँ । गैरेले भनिन्, ‘न्यायपूर्ण वितरण प्रणालीलाई अपनाउनको निम्ति सबैलाई समेटेको बजेट आओस् । अर्थमन्त्रीको ध्यानाकर्षण गराउन चाहन्छु ।’