प्रहरीको कुटाइबाट अध्यक्षको अवस्था गम्भीर, सहकारी पीडितहरुको धर्ना जारी

प्रहरीको कुटाइबाट सहकारी बचतकर्ता संरक्षण राष्ट्रिय अभियान महासंघका अध्यक्षको स्वास्थ्य अवस्था गम्भीर भएको छ । धर्नाको क्रममा अस्ति राति पक्राउको क्रममा अध्यक्ष कुशलव केसीलाई कुटपिट गरिएको बताइएको छ ।

उनको हिजो रातिदेखि वीर अस्पतालमा उपचार भइरहेको छ । सो क्रममा कोषाध्यक्ष देव श्रेष्ठलाई समेत पक्राउ गरेर प्रहरी परिसर टेकू पुर्याइएको थियो । केसीको स्वास्थ्यमा समस्या देखिएपछि प्रहरीले उनीहरुलाई हिजो साँझ रिहा गरेको हो । प्रहरी हिरासतमा अचेत भएपछि केसीलाई वीर अस्पताल लगिएको पीडित आन्दोलनकारीहरुले जनाएका छन् ।

कोषाध्यक्ष श्रेष्ठले भने, ‘अस्तिको शान्तिपूर्ण र्यालीमा प्रहरीले धरपकड गरेर हामीलाई गिरफ्तार गर्यो । हिरासतभित्र हतकडी लगाइयो । प्रहरी दमनबाट पछि हट्ने छैनौं ।’

प्रवक्ता पुरुषोत्तम कार्कीले सहकारी पीडितहरुलाई आज पनि धर्ना जारी राख्न अनुरोध गरेका छन् । उनका अनुसार बिहान १० बजेदेखि तीनकुनेमा धर्ना कार्यक्रम राखिएको छ । उनीहरुले निक्षेपको साँवा ब्याज अबिलम्ब फिर्ता र त्यसको सुनिश्चितताको लागि आयोजित धर्ना कार्यक्रम साँझ ५ बजेसम्म जारी रहने बताएका छन् ।