स्टेजमा लडेकी ज्योतिलाई 'धोकेबाज गायिका'को सान्त्वना

केही दिनअघि इलामको एक सांगीतिक कार्यक्रममा 'सेक्सी गायिका' को परिचय बनाएकी ज्योती मगरले गीत गाइरहँदा स्टेज भासिएको थियो । जुन घटनाले सामाजिक सञ्जालमा चर्चा पाइरहेको छ । 

कतिपयले गायिका मगरले अराजक प्रस्तुती राखेका कारण स्टेज भासिएको भन्दै नकारात्मक टिप्पणी गरेका छन् । केहीले भने आयोजकले नै कमजोर स्टेज बनाएको भन्दै उनको बचाउ गरिरहेका छन् । 

यहीबीच 'धोकेबाज हौ तिमि' बोलको गीतले पछिल्लो समय चर्चामा रहेकी गायिका एलिना चौहानले ज्योती मगरको बचाउ गर्दै दुर्घटनामाथि भद्धा मजाक नगर्न आग्रह गरेकी छन् । उनले सामाजिक सञ्जालमा लामो स्टाटस लेख्दै अरुको दु:खलाई मजाकको विषय बनाउनु गलत हुने भन्दै ज्योतिको बचाउ गरेकी  हुन् । 

उनले लेखेको स्टाटस यस्तो छ : 'मैले पनि भिडियो भाईरल भएपछि थाहा पाए । इलामको माइ नगरपालिकामा आयोजित १३ कुने सिमसार महोत्सवमा ज्योति दिदीले आफ्नो प्रस्तुति दिँदै गर्दा स्टेजमा केही कमजोरी देखियो र दिदी अस्थिर भएर स्टेजमै लड्नुभएछ, अत्यन्तै दुःख लाग्यो । म एक कलाकार भएको हिसाबले कार्यक्रममा आफूअघिका दर्शकलाई रुजाउन अनि उहाँहरुको ध्यान आफूप्रति खिच्न कति कठिन छ त्यो मैले महशुस गर्नसक्छु । 

उक्त भिडियोलाई लिएर कति मानिसले भद्दा मजाक गरेको पाए, त्यो धेरै गलत हो । कृपया त्यसो नगरिदिनुहोला । सबैलाई ज्योति दिदीको आवाज, प्रस्तुति र ज्योति दिदी मन नपर्न सक्छ तर त्यो दुर्घटना थियो, यसलाई मजाकको हिस्सा बनाउनु गलत हो । 

सबैले मलाईपनि मन पराउनुहुन्न, हो सबैको आ-आफ्नो संगीत र अभिनयको स्वाद फरक हुनसक्छ त्यसो भन्दैमा ज्योति दिदीलाई मन पराउने दर्शक श्रोताको पनि कमि छैन । यस्ता दुर्घटना नहोस् भनि सम्पूर्ण कार्यक्रम आयोजकहरुलाई यी कुराहरुमा अत्यन्तै गम्भिर भई ध्यान पुर्याउनु हुन म बिनम्र अनुरोध गर्दछु ।'