विपिनको अवस्थाबारे दुई सरकारी निकायको सूचना बाझियो

प्यालेस्टाइनी अतिवादी समूह हमासको नियन्त्रणमा रहेका भनिएका विपिन जोशीको अवस्थाबारे सरकारका दुई निकायले सार्वजनिक गरेको सूचना परस्पर बझिएका छन् ।

परराष्ट्र मन्त्रालयले गाजाको एक अस्पतालमा विपिन सकुशल फेला परेको सूचना प्राप्त भएको जनाएको केही घण्टामै इजरायलस्थित नेपाली दूतावासले अवस्था अझै अज्ञात रहेको जानकारी गराएको हो । जसका कारण लामो समयदेखि बेपत्ता उनको अवस्थाबारे झन अन्यौल थपिएको छ । 

दूतावासले विपिन हमासको नियन्त्रणमा रहेको पुष्टि गरे पनि अवस्था अझै अज्ञात रहेको जनाएको छ । इजरायल डिफेन्स फोर्सका प्रवक्ताको हवाल दिँदै दूतावासले निकालेको सूचनामा हमास समूहले बन्धक बनाएर गाजातर्फ लगेकामध्येमा विपिन जोशी पनि रहेको तर उनको अवस्थाबारे भने अहिलेसम्म यकिन गर्न नसकिएको उल्लेख छ ।

विज्ञप्तिमा भनिएको छ, ‘जोशीको पछिल्लो अवस्थाबारे यकिन गर्न नसकिएको, निज हालसम्म पनि सम्पर्कविहीन नै रहेको र खोजी कार्य जारी रहेको ब्यहोरा सबैलाई जानकारी गराइन्छ ।’ तर, परराष्ट्रले भने उनी सकुशल रहेको र नेपाल फर्काउन कूटनीतिक पहल भइरहेको जानकारी गराएको छ ।   

सुदूरपश्चिम विश्वविद्यालयको कृषि विज्ञान संकायमा अध्ययनरत विपिनसहितका चार दर्जन विद्यार्थी ‘लर्न एण्ड अर्न’ कार्यक्रमअन्तर्गत इजरायल गएका थिए । उनीहरुले काम गर्ने कृषि फार्ममा हमासले आक्रमण गर्दा १० विद्यार्थीको मृत्यु भएको थियो भने विपिन बेपत्ता छन् ।