कोशीमा उद्धवलाई नै अघि सार्ने कांग्रेसको निर्णय

नेपाली कांग्रेसले कोशी प्रदेश संसदीय दलका नेता उद्धव थापाको नेतृत्वमै सरकार गठनको पहल गर्ने निर्णय गरेको छ । 

सभापति शेरबहादुर देउवा निवास धुम्बराहीमा आज बसेको पार्टीको पदाधिकारी, पूर्वपदाधिकारीसहितका नेताहरुको बैठकले थापाको नेतृत्वमै सरकार बनाउने र यसका लागि आवश्यक पहल गर्ने निर्णय गरेको हो । 

राप्रपाको सहयोग लिएर थापाको नेतृत्वमा सरकार बनाउन पहल गर्ने निर्णय गरेको पार्टी प्रचार विभाग प्रमुख मीन विश्वकर्माले जानकारी दिए । उनका अनुसार थापाको नेतृत्वमा सरकार बनाउने विषयमा पार्टीभित्र मतभेद छैन । 

काँग्रेससहित माओवादी केन्द्र,एकीकृत समाजवादी र जसपाको समर्थनमा दुईपटक मुख्यमन्त्री बनेका थापा सर्वोच्च अदालतको आदेशले दुबैचोटी पदमुक्त भएका थिए । थापाको बहिर्गमनसँगै सर्वोच्च अदालतको परमादेशबाट मुख्यमन्त्री नियुक्त भएका एमाले नेता हिक्मतकुमार कार्कीले राजीनामा दिएपछि कोशीमा संविधानको धारा १६८ को उपधारा ५ को सरकार गठनको तयारी चलिरहेको छ । 

प्रदेश प्रमुखले असोज २६ गतेभित्र मुख्यमन्त्रीमा दावी पेश गर्न सांसदहरुलाई आह्वान गरेका छन् । यस उपधारामा कुनै पनि सांसदले आफूसंग बहुमत देखाएर मुख्यमन्त्रीमा दावी पेश गर्न पाउने व्यवस्था छ । 

९३ सदस्यीय प्रदेशसभामा बहुमतसिद्ध गर्न ४७ सदस्य चाहिन्छ । यहाँ कुनै पनि दलको एकल बहुमत छैन । सबैभन्दा ठूलो दल एमालेको उपसभामुखसहित ४० सिट छ । हाल यौटै गठबन्धनमा रहेका काँग्रेस, २९, माओवादी केन्द्र, १३, एकीकृत समाजवादी ४ र जनता समाजवादी पार्टीका १ सांसद छन् । दुवै 
गठबन्धनमा नरहेको राप्रपासँग ६ जना सांसद छन् ।

कांग्रेस-माओवादी गठबन्धनसँग बहुमतका लागि चाहिने ठिक्क ४७ सांसद भएपनि सभामुख नभएको अवस्थामा उपसभामुखको भूमिका निर्णायक हुन्छ । यसअघि एमालेले थापालाई बहुमत पुग्न नदिन उपसभामुख सृजना दनुवारसहित अध्यक्ष मण्डलमा छानिएका जेष्ठ सदस्यहरुलाई प्रदेशसभा बैठकमा अनुपस्थित गराएको थियो । 

यस्तो स्थितिमा गठबन्धनले राप्रपाको समर्थन खोजेको छ । तर, राप्रपाको प्रदेश नेतृत्व उद्धव थापाप्रति सकारात्मक छैन । यसका बाबजुत काँग्रेसले उनैलाई अघि सार्ने निर्णय गरेपछि कोशीमा सरकार बनाउन दलहरुलाई थप सकस पर्ने  देखिन्छ ।