सीमा समस्या समाधानमा इच्छा राखेका मोदीको इपिजीमा अनिच्छा

भारतले नेपाल–भारत सीमा, सन्धि–सम्झौतालगायत विषयमा विज्ञहरुको सुझावसहितको इपिजी रिपोर्टका सम्बन्धमा यसपटक पनि आलटाल गरेर पन्छाइदिएको छ । प्रधानमन्त्री पुष्पकमल दाहाल प्रचण्डको भारत भ्रमणको एक महत्वपूर्ण एजेण्डा ठानिएको इपिजी रिपोर्टले छलफलमा प्रवेश नै पाएन । 

नेपाल–भारत प्रवुद्ध व्यक्ति समूह (ईपीजी) प्रतिवेदनबारे प्रधानमन्त्रीस्तरमा कुराकानी नभएको त्यहाँका विदेश सचिव विनयमोहन क्वात्राले बताएका छन् । 

प्रधानमन्त्री प्रचण्ड र उहाँका समकक्षी नरेन्द्र मोदीबीच हैदरावाद हाउसमा शुरुमा वान टु वान र लगत्तै प्रतिनिधिमण्डलस्तरीय भेटवार्ता भएको थियो । त्यसपछि आयोजित संयुक्त पत्रकार सम्मेलनमा पनि इपिजी रिपोर्टबारे दुबै पक्षबाट कुनै जानकारी गराइएन । 

छ वर्षअघि दुवै देशका विज्ञहरु सम्मिलित समूहले १९५० को शान्ति तथा मैत्री सन्धिसहित नेपाल–भारतबीच भएका दुई पक्षीय सन्धि–सम्झौता पुनरावलोकनलगायत विषयमा सुझावसहितको संयुक्त रिपोर्ट तयार पारेर दुवै देशका प्रधानमन्त्रीलाई बुझाउने भनिएको थियो । तर, भारतले यसलाई विभिन्न बहानामा आलटाल गर्दै आएको छ ।

इपिजी रिपोर्ट स्वीकार गर्न नचाहेका मोदीले सीमा विवाद समाधान गर्न भने भारत तयार रहेको बताउनुभएको छ । संयुक्त पत्रकार सम्मेलनमा उहाँले दुई देशबीचको सम्बन्ध थप प्रगाढ बनाउन सीमालगायतका सबै समस्या समाधान गरिने प्रतिबद्धता जनाउनुभएको हो ।