रविलाई थप कारबाही नभएकोमा क्यान्टिनभित्र आपत्ति

हिजो बुधवार नयाँ बानेश्वरस्थित संसद क्यान्टिनमा पनि राष्ट्रिय स्वतन्त्र पार्टीका पुनः नियुक्त सभापति रवि लामिछानेलाई थप कारबाही नगरिएको विषयमा चर्चा चल्यो । 

सर्वोच्च अदालतबाट नागरिकतामा दोषी ठहर भएर राजनीतिक अस्तित्व गुमाएका उनलाई आवश्यक कारबाही नभएकोमा गुनासो गरिएको हो । 

गैरआवासीय नेपाली संघका पूर्वअध्यक्ष उपेन्द्र महतोका साख्यै भाइ तथा सिराहामा राजपाबाट निर्वाचित सांसद डा. वीरेन्द्र महतोले यसरी असन्तुष्टि जनाएका हुन् । 

रवि प्रकरणमा संसदमा बोल्न चाहे पनि मौका नपाएका उनी कफी पिउँदै साथीसंग आफ्नो कुरा राख्दै थिए । 

उनले भने,‘नेपालमा कानुन सबैको लागि बराबर छैन । कसैले कानुनलाई खेलाउन पाउँछन् त कसैले कानुनलाई थिचेका छन् । रविको ठाँउमा अहिले कोही मधेशी भएको भए,उसलाई गिरफ्तार गरी जेल चलान भइसक्थ्यो । अन्य कानुनी प्रक्रियाहरु लम्बिन्थ्यो, एकपछि अर्को सजाय हुन्थ्यो । विगतमा रातो राहदानी दुरुपयोगमा संविधान सभाका तत्कालीन सभासद्हरु शिवपुजन राय यादव, बिपी यादव,गायत्री साहलगायतले कारबाही भोग्नुपर्यो । फौजदारी मुद्दा खेप्नुपर्यो,निलम्बितसमेत भए ।’

अवैधानिक नागरिकता र दोहोरो राहदानीजस्ता गम्भीर आरोप खेपिरहँदा पनि रविले खुलेआम उपदेश दिँदै फेरि उपप्रधान तथा गृहमन्त्री बन्न बार्गेनिङ गरेकोप्रति डा. वीरेन्द्रले आपत्ति जनाएका छन् । 

साथै, उनले रविलाई उन्मुक्ति दिन त खोजिएको होइन ? भनेर आशंका व्यक्त गरेका छन् ।