घुसकाण्डमा मुछिएका डिएसपी ठगलाई एसपी क्वार्टरमा सत्कार
घुससहित पक्राउ परेका ईलाका प्रहरी कार्यालय,बुटवलका प्रहरी नायव उपरीक्षक (डिएसपी) ठगबहादुर केसीलाई जिल्ला प्रहरी कार्यालय,रुपन्देहीले हिरासतमा नराखेको पाइएको छ । घुस बार्गेनिङमा रंगेहात पक्राउ परेका उनलाई प्रहरीले मानसम्मानका साथ प्रहरी कार्यालयको पाहुना कक्षमा राखेको हो ।
ठगबहादुरले बुटवलका एक व्यापारीसँग ३५ तोला सुन बरामद गरी मुद्दा प्रक्रिया अघि नबढाई पैसाको बार्गेनिङ गरेको जानकारी पाएपछि अनुसन्धानका लागि खटिएको सिआईबीको टोलीले अस्ति समातेको थियो । बरामद भएको सुन मुद्दा प्रक्रियामा नलगी घुस मागेका ठगलाई एसपी रविन्द्र रेग्मीले आफ्नै निवासको पाहुना कक्षमा राखेका छन् ।
ठगलाई हिरासतमा राखेर मुद्दा अघि बढाउनुको साटो एसपी रेग्मी उनको सेवासुविधाको व्यवस्थापन मिलाउनतर्फ लागेपछि रुपन्देहीका प्रहरीहरु आश्चर्यचकित बनेका छन् । ‘यस्तै खालको मुद्दा तल्लो तहका प्रहरीलाई लागेको भए अरु अभियुक्तसंगै साँघुरो र चिसो हिरासत कक्षमा राखिन्थ्यो’, एक प्रहरीले आक्रोशित हुँदै भने,‘तर, डिएसपीलाई निवासमा सत्कार गरिएको छ ।’
केन्द्रीय अनुसन्धान ब्यूरोका प्रवक्ता कमल थापाले सिआईबी टोलीले उनलाई जिल्ला प्रहरी कार्यालयको जिम्मा लगाइसकेको र यसअघिको प्रक्रिया कार्यालयले नै अघि बढाउने बताए । डिएसपी ठगको निवासबाट ३५ तोला सुन, आठ लाख ५० हजार रुपैयाँ र ९ लाख ५० हजार रुपैयाँको चेक बरामद भएको छ ।
‘नगद पाए सुन फिर्ता गर्ने सहमति भएको रहेछ,सुन फिर्ता गर्न नपाउँदै पक्राउ परिहाले’, अनुसन्धानमा खटिएका एक प्रहरी अधिकृतले भने । उनको केही दिनअघि बुटवलबाट जिल्ला प्रहरी कार्यालय,कास्कीमा सरुवा भएको थियो । हिजो उनी रमाना लिएर कास्की जाने तयारीमा थिए । तर,त्यसअघि नै अनुसन्धान ब्यूरोको टोलीले उनलाई नियन्त्रणमा लिएको हो ।
टिप्पणीहरू