ज्योतिषीले यसरी रोके प्रधानमन्त्रीको अमेरिका यात्रा
नेपालले स्टेट पार्टनरसीप प्रोग्राम (एसपीपी) मा सामेल नहुने निर्णय गरेपछि अमेरिकाले प्रधानमन्त्री शेरबहादुर देउवाको भ्रमण रद्द गरेको धेरैले अनुमान लगाए । सत्ता साझेदार दल एकीकृत समाजवादीका अध्यक्ष माधवकुमार नेपालले नै एसपीपी अस्वीकार गरेको बदलामा अमेरिकाले भ्रमण रोकिदिएको सार्वजनिक प्रतिक्रिया दिएपछि त झन् सबैले त्यही ठाने ।
तर, प्रधानमन्त्रीको अमेरिका भ्रमण नहुनुको वास्तविक कारण भने अर्कै रहेको पत्ता लागेको छ । ज्योतिष विद्यामा असाध्यै विश्वास गर्ने देउवा चिना हेराएर उनीहरूको सल्लाहअनुसार आफैँ अमेरिका नजाने निर्णयमा पुगेको जानकार स्रोतले बतायो । बताइएअनुसार असार दोस्रो साता प्रधानमन्त्रीको बोलाहटमा तीन जना ज्योतिष बालुवाटार पुगेका थिए ।
त्यहाँ उनीहरूले आगामी आमनिर्वाचनको तिथि, प्रधानमन्त्रीको अमेरिका भ्रमणसहित समग्र राजनीतिक अवस्था र देउवाको ग्रहदशा, नक्षेत्र विश्लेषण गरी चुनावअघि विदेश यात्राको योग राम्रो नरहेको सुनाए । चुनावको मितिका सम्बन्धमा निर्वाचन आयोगको सिफारिसलाई लत्याएर ज्योतिषीको भर पर्ने प्रधानमन्त्री उनीहरूको भनाइमा सहमत हुनुभयो, र भ्रमण नगर्ने निर्णयमा पुग्नुभयो ।
असार १५ गते बिहीबारदेखि नवरात शुरु भएको छ । ज्योतिष शास्त्रका अनुसार यो बार नवरात्र शुरु हुनुलाई राम्रो मानिँदैन । तर, प्रधानमन्त्रीको हकमा ठ्याक्कै के हो भन्ने बुझ्न बालुवाटारले उनीहरूलाई बोलाएर ग्रहदशा हेराएको स्रोतले बताएको छ । देउवाको तीन वटा चिना छ । ती सबै एकै ठाउँमा राखेर फ्याक्ट रुजु गरिएको थियो ।
त्यसपछि बल्ल ज्योतिषले मंसिर ४ गते चुनावको मिति तोक्न र अमेरिका यात्रा रोक्न सुझाव दिएका हुन् । यस क्रममा ०७९ पुसपछि दुईभन्दा बढी दल मिलेर सरकार चलाउन सकिने योगसमेत निक्लेको बताइएको छ । प्रधानमन्त्रीलाई यस्तो सुझाव दिने ज्योतिष को–को हुन् भन्नेबारे स्रोतले खुलाएको छैन ।
तर, देउवाले धेरै विश्वास गर्ने ज्योतिष तथा वास्तुविद् सुरेशचन्द्र रिजालसहितको टिम रहेको भने पक्का छ । रिजाल देउवाको सातचोटि प्रधानमन्त्री हुने योग रहेको भविष्यवाणी गरेर चर्चामा आएका ज्योतिष र १० वर्षदेखि यो विद्यामा लागेका प्युठाने हुन् । हाल कालोपुल बस्ने उनले असार महिनामा मात्र प्रधानमन्त्रीसँग आधा दर्जन पटक भेटिसकेको बताइन्छ ।
रमाइलो पक्षचाहिँ, असार १७ गते देशमा राजनीतिक बितण्डा मच्चिँदैछ भनेर एमाले अध्यक्ष केपी ओलीको कान फुक्ने पनि तिनैमध्येका एक ज्योतिष भएको जानकार स्रोतले बताएको छ ।
त्यस दिनपछि प्रधानमन्त्री देउवाको ग्रहदशा राम्रो नभएकाले गठबन्धन टुट्ने र ओली शक्तिशाली हुने ज्योतिषीको भविष्यवाणी सुनेर उत्साहित हुनुभएका ओलीले दिनै किटान गरेर गठबन्धन भत्किने घोषणा गर्नुभएको हो भनिन्छ । द्वन्द्वात्मक भौतिकवादलाई आदर्श मान्ने मुलुककै सबैभन्दा ठूलो कम्युनिष्ट पार्टीको अध्यक्षले ज्योतिषको हवाला दिएर राजनीतिक समीकरण फेरिने घोषणा गर्नु आफैँमा अमिल्दो र हाँस्यास्पद त थियो नै ।
साथै उहाँले घोषणा गरेजस्तो कुनै ठूलो राजनीतिक उलटपुलट नभएकाले ज्योतिषको भविष्यवाणीले समेत ‘हावा’ खाएको टिप्पणी पनि भइरहेको छ । तर, ज्योतिषशास्त्रमा विश्वास गर्नेहरूले भने अर्थमन्त्री जनार्दन शर्माको राजीनामासँग ज्योतिषको भविष्यवाणी र ओलीको घोषणा मिलेको तर्क गरेका छन् ।
टिप्पणीहरू