पदयात्राका निम्ति आकर्षक गन्तव्य बन्दै कोरी (फाेटाे फिचर)

पछिल्लो समय देशभित्र हाइकिङ (पदयात्रा) गर्न रुचाउनेहरूको संख्या बढ्दो छ। आन्तरिक पर्यटकसँगै विदेशीहरू पनि पदयात्राका विभिन्न गन्तव्यतर्फ आकर्षित हुन थालेका छन् । मुलुकमा छोटो र रमणीय पदयात्राका धेरै विकल्पमध्ये कास्कीको मादी गाउँपालिका–१ मा अवस्थित कोरी एउटा आकर्षक गन्तव्य बन्दै गएको छ ।

प्राकृतिक सुन्दरताले भरिपूर्ण कोरीबाट छर्लङ्ग हिमालहरू देखिन्छन् । यहाँबाट लमजुङ हिमाल, अन्नपूर्ण दोस्रो, माछापुच्छ्रे् र मनास्लु हिमालको सुन्दर दृश्य अवलोकन गर्न सकिन्छ ।

कोरी पुग्नका लागि पोखरादेखि सिक्लेससम्म बसमा यात्रा गर्नुपर्छ । आफ्नै सवारीसाधनबाट पनि सिक्लेससम्म सहजै पुग्न सकिन्छ। सिक्लेसबाट कोरी पुग्ने दुई बाटो छन्, एउटा तासा हुँदै र अर्को हुगु हुँदै । सिक्लेसबाट हुगु पुग्न करिब सातदेखि आठ घण्टा पैदल हिँड्नुपर्छ, र त्यहाँबाट थप एघार बाह्र घण्टा यात्रा गरेपछि कोरी पुगिन्छ । तासाको बाटो भने पूर्ण उकालो रहेकोले केही चुनौतीपूर्ण भए पनि दृश्यले सबै थकान हराउँछ ।

घण्टौंको पदयात्रापछि कोरी पुग्दा यात्रुहरूलाई हिमालको नजिकको अनुभव र प्रकृतिको शान्त सौन्दर्यले मोहित पार्छ ।

तस्विर : गणेश बज्र लामा याेजञ्जन