रात परेपछि राजधानी छिर्ने मुख्य नाका बन्द

त्रिभुवन राजपथको नागढुंगा–पिप्लामोड सडक निर्माण तथा सुधार गर्नुपर्ने भएकाले त्रिभुवन राजमार्गको नागढुंगा–नौबिसे खण्ड पर्सिदेखि रातको समयमा बन्द हुने भएको छ । नागढुंगा–मुग्लिङ सडक योजना (पूर्वी खण्ड)ले थानकोट नजिकैको नागढुंगा–पिप्लामोड सडक निर्माण तथा सुधार गर्नुपर्ने जनाउँदै सडक बन्द हुने जानकारी दिएको छ ।

पर्सिदेखि वैशाख मसान्तसम्म राति ११ बजेदेखि बिहान ३ बजेसम्म उक्त सडकमा सवारीसाधन रोकेर निर्माण गर्न लागिएको हो । चार घण्टाका लागि काठमाडौंबाट बाहिरिने सवारीसाधन नागढुङ्गा चेकपोष्टमा र काठमाडौं भित्रिने सवारी साधन खत्रीपौवा पुलमा रोकिने छ ।

आगामी १० दिन उक्त राजमार्गको सट्टा विकल्पको लागि सीतापाइला–भीमढुंगा–रामकोट–धार्के सडक तथा सामाखुशी–टोखा–गुर्जेभञ्ज्याङ–छहरे–त्रिशूली–गल्छी सडक प्रयोग गर्न अनुरोध गरिएको छ ।

रातको समयमा पनि एम्बुलेन्स र सुरक्षा निकायका सवारीसाधनहरु भने रोकिने छैनन् ।