पूर्व राजालाई घर भित्र्याउन ढोकैमा कोणसभा

पूर्व राजा ज्ञानेन्द्र शाहको स्वागत गर्दै राजावादीहरुले महाराजगञ्जस्थित निर्मल निवास बाहिर कोणसभा गर्ने भएका छन् । सोही बेला पूर्व राजाको अभिनन्दन पनि गर्ने तयारी रहेको स्रोतले बताएको छ ।

दिउँसो ३ बजे त्रिभुवन अन्तर्राष्ट्रिय विमानस्थलको आन्तरिक टर्मिनलदेखि सिनामंगल,गौशाला, चाबहिल,महाराजगञ्ज हुँदै निर्मल निवाससम्म राजावादीहरुले जय जयकार गर्दै छन् । शाह दिउँसो ३ बजे समिट एअरको चार्टर्ड उडानमा पोखराबाट आउने बुझिएको छ । 

उक्त विमान कम्पनी नेपालगञ्ज बेस्ड एअरलाइन्स हो । नेपालगञ्जबाट कर्णालीका विभिन्न जिल्लामा उडान सञ्चालन गर्दै आएको विमानलाई शाहले पोखरासम्म ल्याएर त्यहाँबाट काठमाडौं र यताबाट पुनः नेपालगञ्ज पठाउनुलाई खर्चको हिसाबले निकै महँगो ठानिएको छ । बुद्धलगायतका विमानको नियमित उडानमा आउन नचाहनुको अनुमान गर्दै एक जनाले भने, ‘त्यसमा पनि उहाँको लगानी छ कि ? नत्र यति महँगो उडान किन गर्नुपर्यो र ? बुद्धको अस्ति पाँग्रा खसेकाले सुरक्षामा विश्वस्त हुन नसकेको पनि हुनसक्छ । ’