ट्राफिक कारवाहीमा परेकालाई सडकमा उभ्याउने गृहमन्त्रीको निर्णय विवादमा

ट्राफिक नियम उल्लङ्घन गर्नेहरुलाई स्वयमसेवकका रुपमा सडकमा खटाउने गृहमन्त्री रवि लामिछानेको निर्णय विवादमा परेको छ । 

गणतन्त्र दिवसको उपहार भन्दै गृहमन्त्रीले महिला ट्राफिक प्रहरीलाई महिनावारीका ४ दिन छुट्टी दिने र मापसेलगायत ट्राफिक कारवाहीमा परेकाहरुले स्वयंसेवी भएर सडकमा खट्नुपर्ने घोषणा गरेका थिए । तर, कार्यान्वयनको प्रारम्भिक दिनमै निर्णय विवादित भएको हो । 
  
सडक अनुशासन पालना गराउने जस्तो अत्यन्त संवेदनशील सवाललाई गृहमन्त्री लामिछानेले हल्का रुपमा लिएको एकथरीले टिप्पणी  गरिरहँदा कतिपयले चैं लोकरिझ्याईका लागि हचुवामा गरिएको निर्णय भनेका छन् । समर्थकहरु भने लामिछानेको यो निर्णयको बचाउमा सामाजिक सञ्जालमा सक्रिय देखिन्छन् । 

ट्राफिक नियम मिचेर कारवाहीमा परेकाहरुलाई नै सडकमा खटाउँदा दुर्घटना बढ्नसक्ने चिन्ता पनि भैरहेको छ । यसैबीच नेपाली कांग्रेसका नेता तथा संघीय सांसद रामहरी खतिवडाले उक्त निर्णय सच्याउनुपर्ने बताएका छन् । 

संसद्को राज्य व्यवस्था तथा सुशासन समितिका सभापतिसमेत रहेका उनले गृहमन्त्री लामिछानेमाथि कटाक्ष गर्दै कसैले फेसबुकबाट नयाँ ट्राफिक नियम बनाउन नसक्ने बताए । आज सिंहदरबारमा पत्रकारहरुसँग कुरा गर्दै उनले गृहमन्त्री 'जे पायो त्यही निर्णय गर्दै हिँडेको' आरोप लगाए । 

'कानुनी राज्यको परिकल्पना गरेका छौं । तर, कानुनी राज्य भनेको कसैको सनकका भरमा जतिखेर जे पायो त्यही निर्णय गर्ने होइन,' खतिवडाले भने, 'अहिले सडकमा केही मान्छेहरूलाई उपप्रधान तथा मन्त्रीको निर्देशनमा सडकमा उभ्याउने गरिएको छ, यो सरासर गलत छ ।'

अध्ययन र कानुनविना नै नागरिकलाई सडकमा खटाउन नमिल्ने उनको धारणा छ । 

ट्राफिक प्रहरीले भने गृहमन्त्रीको घोषणाअनुसार कार्यान्वयन शुरु गरिसकेको छ । हिजो काठमाडौँ उपत्यकाका विभिन्न चोकहरुमा ट्राफिक कारवाहीमा परेकाहरुलाई स्वयंसेवकका रुपमा खटाइएको थियो ।