ग्लोबल बैंकका डेढ सयबढी शाखाद्वारा वित्तीय साक्षरता कार्यक्रम

ग्लोबल आइएमई बैंक लिमिटेडका एक सय ६९ वटा शाखा कार्यालयले एकसाथ वित्तीय साक्षरता कार्यक्रम सम्पन्न गरेका छन् । बैंकको संस्थागत सामाजिक उत्तरदायित्वअन्तर्गत वित्तीय पहुँचबाट बाहिर रहेका वर्गलाई लक्षित गर्दै सञ्चालन गरेको साक्षरता कार्यक्रम सम्पन्न भएको जनाइएको छ ।

बैंकले सातै प्रदेशमा आयोजना गरेको कार्यक्रममा २० हजार जनाभन्दा बढीले सहभागिता जनाएका छन् । कार्यक्रममा कृषक, लघु, साना तथा मझौला उद्यमी, मजदुर, वैदेशिक रोजगारमा जाने सम्भावित व्यक्ति, विद्यार्थी, महिला, विप्रेषण प्राषक तथा स्थानीय युवा–युवतीहरुको सहभागिता रहेको बैंकले जनाएको छ ।

जसअनुसार कोशीमा दुई हजार पाँच सय, मधेशमा दुई हजार, बागमतीमा पाँच हजार, गण्डकीमा चार हजार पाँच सय, लुम्बिनीमा तीन हजार पाँच सय, कर्णालीमा पाँच सय र सुदूरपश्चिममा दुई हजार पाँच सय जना सहभागी भएका थिए । 

बैंकले चालु आर्थिक वर्ष २०८०/८१ मा देशभर रहेका आफ्ना तीन सय ५४ शाखामार्फत वित्तीय साक्षरता तथा डिजिटल बैंकिङ्ग प्रवद्र्धन कार्यक्रम सञ्चालन गरिरहेको छ । त्यस्ता कार्यक्रमबाट आम नागरिकलाई बचत, कर्जा, रेमिट्यान्स, डिजिटल बैंकिङ्ग, बीमा, लगानी, अतिरिक्त बैंकिङ्ग सेवा, वित्तीय ठगी र वित्तीय अनुशासनसम्बन्धी विषयवस्तुमा जानकारी तथा सचेत गराइएको बैंकको भनाइ छ ।

ग्लोबल आइएमई बैंक मुलुकभर शाखा सञ्जाल रहेको निजी क्षेत्रको पहिलो वाणिज्य बैंक हो । यसको देशभर ३५४ शाखा कार्यालय, ३७९ एटिएम, २७७ शाखारहित बैंकिङ्ग सेवा, ६८ एक्सटेन्सन तथा राजश्व संकलन काउन्टर तथा तीन वैदेशिक प्रतिनिधि कार्यालयसमेत गरी एघार सयभन्दा बढी सेवा केन्द्र छन् ।

बैंकले विभिन्न सेवासुविधासहितका योजनामार्फत् आफ्ना ४६ लाखभन्दा बढी ग्राहकलाई उत्कृष्ट सेवा प्रदान गर्दै आइरहेको छ । यस्तै, संयुक्त राज्य अमेरिका, संयुक्त अधिराज्य, क्यानडा, अष्ट्रेलिया, मलेसिया, दक्षिण कोरिया, जापान, साउदी अरेबिया, कतार, युएई, बहराइन, कुवेत, भारत, जोर्डन, हङकङलगायत मुलुक र क्षेत्रबाट रेमिट्यान्स भित्र्याएर मुलुकको अर्थ व्यवस्थामा समेत महत्वपूर्ण योगदान पुर्याइरहेको छ ।