प्रवासी नेपाली एकता मञ्चको अधिवेशन आउँदो असारमा

नेकपा एकीकृत समाजवादीनिकट प्रवास संगठन प्रवासी नेपाली एकता मञ्च युरोपको अन्तर्राष्ट्रिय कमिटी प्रथम अधिवेशन आउँदो असारमा हुने भएको छ । 

पार्टीको स्थायी कमिटी सदस्य समेत रहेका प्रवास समन्वय कमिटी संयोजक श्रीप्रसाद साहको अध्यक्षतामा आज बसेको भर्चुअल बैठकले अधिवेशन आगामी असार २२ र २३ गते काठमाडौंमा गर्ने निर्णय गरेको हो । 

अधिवेशनमा राजनीतिक,सांगठनिक र आर्थिक प्रतिवेदन प्रस्तुत हुने तथा आगामी कार्यकालका लागि नयाँ कार्यसमिति चयन गरिने मञ्चका सहसंयोजक सुभाष पोखरेलले जानकारी दिए । 

‘पार्टीको संगठन भएकाले राजनीतिक विषयमा छलफल त हुने नै छ । तर, सँगै प्रवासमा रहेका नेपाली श्रम, सीप र पुँजीलाई कसरी भित्र्याउने ? र  विदेशमा रहेका नेपालीको मतदान गर्न पाउने व्यवस्थालगायतका विषयमा पनि गम्भीर छलफल गरिने छ,’ उनले भने ।

त्यस्तै, अधिवेशनमा प्रवासी नेपाली एकता मञ्चको ५१ सदस्यीय आयोजक कमिटी, राष्ट्रिय कमिटीबाट एक जना र कमिटीले मनोनित गरेको पाँच प्रतिशत गरी दुई सय प्रतिनिधि सहभागी हुने मञ्चका सचिव ध्रुव सुवेदीले बताए । 

उनका अनुसार अधिवेशनमा अमेरिका, युरोप, मध्यपूर्वी तथा पूर्वी एसियासहित ओसिनिया महादेशका विभिन्न ३० भन्दा बढी राष्ट्रका प्रतिनिधिले भाग लिनेछन् । 

पार्टीको महाधिवेशनकै समयमा मञ्चको पनि अधिवेशन गर्न लागिएकोले प्रवासबाट अधिवेशनमा भाग लिने प्रतिनिधिहरु थप उत्साहित भएको उनले बताए ।

एकीकृत समाजवादीको दशौं राष्ट्रिय महाधिवेशन आउँदो असार १६ गतेदेखि २० गतेसम्म काठमाडौंमा हुदैँछ ।