विदेशीका नाममा पक्राउ, स्वदेशीसँगै जेल

विदेशी नागरिकलाई नागरिकता बेचेको अभियोगमा पक्राउ परेका दुई अधिकृत स्वदेशी नागरिकलाई नागरिकता बिक्री गरेको मुद्दा अघि आएपछि कारागार चलान भएका छन् । विदेशीका हकमा भने अझै अनुसन्धान बाँकी रहेको भन्दै प्रहरीले सरकारी वकिलको कार्यालयमार्फत अदालतलाई अनुसन्धान जारी रहेको बताएको छ । 

दुई अधिकृतसहित थप एक जनालाई जिल्ला अदालत काभ्रेपलाञ्चोकले थुनामा पठाउने आदेश गरेको छ । अर्का एकजनालाई भने पक्राउ पुर्जी जारी भएको छ । थुनछेक बहसका क्रममा न्यायाधीश शिवकुमार पोखरेलको इजलासले नागरिकता बिक्री अभियोगमा पक्राउ परेका अधिकृतद्वय झपेन्द्रराज खरेल र रामचन्द्र अर्यालसहित नागरिकता खरिद गर्ने काठमाडौँ जिल्ला काठमाडौँ महानगरपालिका वडा नम्बर ४ का ४० वर्षीय राजु गुरुङलाई थुनामा पठाउन आदेश दिएको हो ।

राजु गुरुङका बाबु  हरिभक्तलाई पक्राउ पुर्जीको आदेश भएको जिल्ला अदालत काभ्रेपलाञ्चोकका अधिकृत एवं सूचना अधिकारी हिराकुमारी भण्डारीले बताइन् । अर्याल त्यसबेला जिल्ला प्रशासन काभ्रेमा सुब्बा थिए भने खरेल अधिकृत । पक्राउ परेका राजु गुरुङले ३÷४ लाख रूपैयाँमा नागरिकता र राहदानी बाबु हरिभक्त गुरुङले खरिद गरेर लगिदिएको बयान दिएका थिए । उनीहरू दुबै जना हङकङ बस्दै आएका थिए ।

गुरुङले युएस जाने प्रयोजनका लागि काठमाडौँबाट लिएको सक्कली नागरिकताका अलावा काभ्रेपलाञ्चोक जिल्लाबाट नागरिकता र राहदानी खरिद गरेका थिए । ‘काभ्रेमा नागरिकता र राहदानी किन्न पाइने सूचनाका आधारमा बाबु हरिभक्त गुरुङले ०७४ सालमा बनेपा १४ ठेगाना राखी ०७४ मंसिर १३ गते लिएका थिए ।

मैले लिएको नागरिकतामा अधिकृत झपेन्द्रराज खरेलले हस्ताक्षर गरेका छन्’–अभियुक्त राजुले भनेका छन् । प्रजिअ शिव सिंखडा थिए । नागरिकता फाँटमा अनुुसूची मिलाउने र भर्ने काम सुब्बा रामचन्द्र अर्यालले गरे । सुन तस्करी प्रकरणमा पक्राउ परेका विदेशी नागरिकलाई नागरिकता दिएको अभियोगमा समेत अधिकृतद्वय खरेल र अर्याल अनुसन्धानमा छन् । बागमती प्रदेशसभा सचिवालयबाट रामचन्द्र अर्याल र मेलम्ची नगरपालिकाबाट अर्का अधिकृत झपेन्द्रराज खरेल पक्राउ परेका हुन् ।

प्रहरीको केन्द्रीय अनुसन्धान व्युरोको जाहेरीले वादी नेपाल सरकार, प्रतिवादी बेल्जियन नागरिक दावा छिरिङ भनिने निमा तामाङ भएको झुट्टा बिवरण पेश गरी नागरिकता लिएको मुद्दामा उनीहरूलाई पक्राउ गरिएको हो । खरेललाई निमाको अलावा राजु गुरुङ र कुलानन्द भण्डारीलाई समेत झुटा विवरण राखेर नागरिकता दिएको अभियोग छ । उनीहरू तीनै जनाको नागरिकतामा झपेन्द्रराज खरेलको हस्ताक्षर छ ।

दावा छिरिङले निमा तामाङका नाममा २०७४ पुस २० गते ३०–०१–७४–११८६८ नम्बरको नागरिकता लिएका थिए भने चितवन घर भई काठमाडौँ बस्दै आएका राजु गुरुङले २०७४ मसिर १३ गते नागरिकता लिए । त्यस्तै कुलानन्द भण्डारीले २०७४ पुस २० गते नै नागरिकता लिएको पाइन्छ । उनीहरू लगायत सोही अवधिमा ३ सय ५० वटा नागरिकता अनुसूचीबिना जारी गरेको खुलासा भएको थियो ।

- मोतीराम तिमल्सिना

(साभार:जनआस्था साप्ताहिकबाट)