एसईईमा पाँँच लाख सहभागी, जापानमा पनि परीक्षा केन्द्र
चैत्र १५ गतेदेखि सुरु हुने यो वर्षको माध्यमिक शिक्षा परीक्षा (एसईई)को तयारी अन्तिम चरणमा पुगेको छ ।
देशभर दुई हजार ५७ केन्द्र निर्धारण गरिएको जानकारी दिँदै राष्ट्रिय परीक्षा बोर्डले तयारी अन्तिम चरणमा पुगेको जनाएको छ । बोर्डका अनुसार जापानमा समेत एउटा परीक्षा केन्द्र निर्धारण गरिएको छ । त्यहाँबाट २३ जना विद्यार्थीले जाँच दिनेछन् ।
यसवर्ष मुलुकभरबाट करिब पाँच लाख विद्यार्थी एसईई परीक्षामा सहभागी हुँदैछन् । पाँच लाख प्रश्नपत्र छापिइसकेको परीक्षा नियन्त्रण कार्यालयका परीक्षा नियन्त्रक नन्दलाल पौडेलले जानकारी दिए ।
पाँच लाख चार हजार ४१४ विद्यार्थी फाराम भरे पनि केही विद्यार्थीको संख्या घट्न सक्ने उनको अनुमान छ । प्रश्नपत्रहरु ७६ जिल्लाका प्रहरी कार्यालयमा पठाइसकेको र काठमाडौं जिल्लामा परीक्षाको अघिल्लो दिन मात्रै पठाइने पौडेलले बताए ।
उनका अनुसार परीक्षा सञ्चालनका लागि आवश्यक बजेट सातवटै प्रदेश सरकारअन्तर्गत सामाजिक सुरक्षा मन्त्रालयले व्यवस्थापन गर्नेछ । प्रत्येक परीक्षा केन्द्रमा केन्द्राध्यक्ष र सहायक केन्द्राध्यक्ष एक–एक जना रहने छन् ।
तीन सय विद्यार्थी रहेको केन्द्रमा दुई सहायक केन्द्राध्यक्ष, दुई विद्यार्थी बराबर एक निरीक्षक, एक सय ५० देखि दुई सयसम्म परीक्षार्थी भएको केन्द्रमा एक सहयोगी र त्योभन्दा बढी भएका स्थानमा दुई सहयोगी खटाइने बोर्डको निर्णय छ ।
टिप्पणीहरू