नेपाली सेनाद्धारा पृथ्वी स्मारकको सरसफाई
नेपाली सेनाले नुवाकोटको विदुर नगरपालिका–५ देविघाटमा रहेको पृथ्वी स्मारक उद्यान परिसरको सरसफाइ गरेको छ ।
पृथ्वीनारायण शाहको देहावसान भएको स्थानलाई संरक्षण, सफा र संवद्र्धन गर्ने उद्धेश्यका साथ सेनाको जबरजंग देविघाट ब्यारेकले आज उक्त परिसरको सरसफाइ गरेको हो ।
जबरजंग गणका सेनाले विगतदेखि नै देविघाटमा रहेको ऐतिहासिक पृथ्वीनारायण शाहको स्मारक सफाइ गर्दै आएको छ । पृथ्वी स्मारकमा आवश्यक पर्ने हरेक कार्यमा सेनाको सहयोग रहँदै आएको छ ।
हिउँद सुरु भएसँगै स्मारक वरपर भएका फोहोर, घाँसपात, झाडीलगायत परिसरको प्राङ्गण वरिपरि पनि सरसफाई गरेको जबरजंग गणले जनाएको छ ।
ऐतिहासिक, पुरातात्तिवक तथा धार्मिक महत्वको पर्यटकीय स्थल देविघाटको महत्व युवापिँढीमा बोध गराउन विगतका दिनदेखि नै पृथ्वी स्मारक संरक्षण तथा सरसफाई कार्य गर्दै आइरहेको गणको भनाइ छ ।
गणले विगतका वर्षहरुमा पनि ऐतिहासिक, धार्मिक, सांस्कृतिक क्षेत्रअन्तर्गत मठमन्दिर, विश्राम स्थल, चौतारोलगायतका ऐतिहासिक स्थलको संरक्षण, मर्मत, सरसफाईजस्ता कार्य गर्दै आएको जनाएको छ ।
टिप्पणीहरू