खराब मौसमका कारण बालुवाटारमा नागरिकता बाँड्ने कार्यक्रम प्रभावित

प्रधानमन्त्री पुष्पकमल दाहाल प्रचण्ड खराब मौसमका कारण हिजो राति धनगढीमा बसेर आज बिहान राजधानी फर्कनुभएको छ । समाजवादी मोर्चाको सन्देश सभालाई सम्बोधन गर्न र अन्य कार्यक्रममा सहभागी हुन जानुभएका प्रधानमन्त्री हिजो राति धनगढीस्थित नेपाल राष्ट्र बैंकको गेष्ट हाउसमा बस्नुभएको हो ।

साँझ साढे ७ बजेको श्री एअरलाइन्सको नियमित उडानमा काठमाडौं आउन धनगढी विमानस्थलमा पुग्नुभएका प्रधानमन्त्री मौसममा आएको खराबीपछि उडान स्थगित पश्चात् बैंकको अतिथि गृह पुग्नुभएको हो । उहाँ जनता समाजवादी पार्टीका अध्यक्ष उपेन्द्र यादवसहित १४ जनाको टोलीसँगै राजधानी फर्कन लाग्नुभएको थियो ।

यादवलगायत अन्य नेता तथा कार्यकर्ताहरु नजिकैको होटल डिभोटीमा बास बसेका थिए । आज बिहान भएको उक्त विमान कम्पनीको उडान नम्बर एसएचए २२६ मा प्रधानमन्त्री ८ बजे काठमाडौं आइपुग्नुभएको हो ।

यता प्रधानमन्त्रीको सरकारी निवास बालुवाटारमा आज बिहान ७ बजे गैरआवासीय नेपालीहरुलाई नागरिकता वितरण गर्ने कार्यक्रम राखिएको थियो । प्रधानमन्त्रीको उडान प्रभावित भएपछि उक्त कार्यक्रम डेढ घण्टा पछाडि धकेलिएको हो ।