प्रधानमन्त्रीद्वारा अल्पविकसित मुलुकको दिगो विकासमा ध्यान दिन विकसित मुलुकलाई आग्रह

प्रधानमन्त्री पुष्पकमल दाहाल प्रचण्डले विकसित मुलुकहरूले अल्पविकसित मुलुकलाई आफ्नो प्रतिबद्धताअनुसारको वित्तीय सहयोग उपलब्ध गराउनुपर्ने बताउनुभएको छ । 

संयुक्त राष्ट्र संघको ७८औँ महासभामा भाग लिन न्युयोर्क पुग्नुभएका प्रधानमन्त्री दाहालले अल्पविकसित मुलुकहरूको समूहको दिगो विकासका लक्ष्यसम्बन्धी सम्मेलनलाई सम्बोधन गर्दै उक्त धारणा राख्नुभएको हो ।

सन् २०३० सम्म दिगो विकासका लक्ष्य हासिल गर्न चुनौतीपूर्ण रहेको उल्लेख गर्दै उहाँले भन्नुभयो, ‘कोभिड–१९ महामारी, जलवायु परिवर्तन, भूराजनीतिक तनावजस्ता विभिन्न खालका संकट र यसको प्रभावले अल्पविकसित मुलुकलाई दिगो विकास लक्ष्य प्राप्त गर्न समस्या परेको छ ।’

उहाँले सन् २०२१ को तुलनामा २०२२ मा अल्पविकसित मुलुकमा विकसित मुलुकबाट हुने प्रत्यक्ष वैदेशिक लगानी ३० प्रतिशतले घटेको उहाँको भनाई छ । यसले ती मुलुकका पूर्वाधार, नवीकरणीय ऊर्जा, खानेपानी तथा सरसफाइ, खाद्य सुरक्षा, स्वास्थ्य, शिक्षामा नराम्रोसँग असर पारेको प्रधानमन्त्रीले उल्लेख गर्नुभयो । 

सन् २०२५ सम्ममा अल्पविकसित राष्ट्रहरूको ऋण संकटलाई सम्बोधन गर्नुपर्ने अवस्था आइसकेको प्रधानमन्त्रीको भनाई छ । अतिकम विकसित मुलुकको औसत वाह्य ऋण सन् २०११ मा ४१ प्रतिशत रहेकामा सन् २०२२ मा ५४ प्रतिशत पुगेको छ ।