यौन हिंसा पीडित युवतीमाथि थप यातना

घरमा काम सघाउने चेलीमाथि कर्के नजर लगाएबापत सरकारी इञ्जिनियर जेल गएका छन् भने युवतीलाई ‘होस्टाइल’ गराउन खटिएका एक जना वकिलसहित सब–इञ्जिनियर धरौटीमा छुटेका र बाँकी २ जना फरार भएका छन् । पुर्पक्षका लागि थुनामा पठाइएका मध्यपहाडी लोकमार्ग आयोजनाका निर्देशक इञ्जिनियर हरिकुमार पोखरेलको मुद्दाउपर गत शुक्रबार काठमाडौं जिल्ला अदालतमा ठूलै बहस चलेको थियो । 

यस प्रकरणमा मुछिएका वकिलको नाम भोजराज रेग्मी हो । उनले पीडित आस्था बस्नेतसँग मोलमोलाइ गरेको अडियोसहितको समाचार जनआस्थाले प्रकाशन गरेको थियो । हाल उनी फरार छन् । आरोपितलाई बचाउन खोज्ने हिमालय एअरलाइन्सका इञ्जिनियर रञ्जितकुमार जैसवाल भने ३ लाख धरौटीमा छुटेका छन् । पीडितलाई २५ लाख लिएर मिलापत्र गर्न अनेकौं दबाब दिएको आरोपमा गत साउन ३० गते उनलाई प्रहरीले समातेको थियो । काभ्रेका अमित भन्ने अमन तामाङ दबाब दिन पीडितको कोठासम्मै पुगेका थिए । एक जना डिएसपीलाई गाडी खरिदबिक्रीमा ठगेर भागेका उनलाई प्रहरीले खोजिरहेको छ । 

‘त्यो पैसा लिनु, विदेश जानु, गाउँ जाने भए जानु । ऊ त दुईतीन महिना जेल बस्छ, निस्किन्छ । भोलि नराम्रो गर्न सक्छ । मज्जाले सोचविचार गर्नु अनि पैसा लिएर साइड लाग्नु । त्यसपछि ठाउँ छोड्नु, मोबाइल नम्बर पनि चेञ्ज गर्नु’, पीडित युवतीलाई अमनको धम्कीयुक्त सल्लाह हो यो । जवाफमा पीडितले भन्छिन्, ‘म पैसा लिँदिन । त्यो पैसाले मेरो अस्मिता फिर्ता आउँछ ? ऊ दुई दिनको लागि भए पनि किन जेल नजाओस्, म खुशी हुन्छु । उसको हातमा हत्कडी लागेको देख्न पाऊँ ।

ज्यान जाओस् तर अन्यायको विरोधमा लड्छु । म डिप्रेसनमा छु, मलाई थप तनाव दिने काम नगर्नुस् ।’ यी सबै प्रकरणको अडियो प्रमाण जनआस्थासँग सुरक्षित छ । यही मामिलामा अर्का बिचौलिया हुन् सुर्खेतका रामजी भनिने चेतन न्यौपाने । उनले गाउँमा बस्ने पीडितका बुवालाई फोन गरेर थर्काएका थिए । कांग्रेसनिकट न्यौपानेले वडाध्यक्ष समिर कार्कीमार्फत पनि पीडितको बुवालाई मेलमिलाप नगरे जे पनि हुनसक्ने भन्दै धम्काएको स्रोतले बतायो । पक्राउ परेका छुटे, दुई फरार पीडितलाई दबाब दिएको आरोपमा पक्राउ परेका दुई जना छुटेका छन् भने दुई जना फरार सूचीमा छन् । पर्साको वीरगञ्ज महानगरपालिका वडा नम्बर १२, रानीघाट घर भई काठमाडौंको सिनामंगल बस्दै आएका जैसवालसँगै दैलेखको डुंगेश्वर गाउँपालिका वडा नम्बर ५ घर भएर सिनामंगल बस्ने न्यौपाने पनि पक्राउ परेका थिए । 

काठमाडौं जिल्ला अदालतको इजलाश १३ नम्बरमा भएको दुई दिन लामो बहसपछि न्यायाधीश भोलानाथ ढकालले उनीहरूलाई साढे तीन लाख धरौटीमा छोड्न आदेश दिएका हुन् । पीडितको तर्फबाट १७ जनाले वकालतनामा भरेका थिए । बद्रि भुसाल, दिनेश त्रिपाठी र दुई जना सरकारी वकिलसहित ९ जनाले गरेको बहश शुक्रबार टी टाइमसम्म चलेको थियो ।’ ५० हजार, एक लाख रूपैयाँसम्म मागेको भए पनि हुन्थ्यो तर, साढे तीन लाख धरौटी सुनाउनु भनेको ठूलो सजायँ हो’, स्रोतले भन्यो । यौन शोषणलाई अवसर भनेर व्याख्या गर्ने अधिवक्ता भोजराज रेग्मी भने अहिले बेपत्ता छन् । 

पीडितको नम्बर दिने वडाध्यक्ष

रामेछाप नगरपालिका–७ का वडाध्यक्ष समिर कार्कीले पीडितका बुवाको नम्बर बिचौलिया पक्षलाई बाँडेको तथ्य खुलेको छ । उनको गैरजिम्मेवारीपनका कारण विभिन्न नम्बरबाट फोन गरेर गुण्डाहरूले धम्क्याएको पीडित पक्षको आरोप छ । यता, वडाध्यक्ष कार्कीले भने आफूबाट गल्ती भएको स्वीकार्दै भरत चौलागाईंलाई मात्रै नम्बर दिएको दाबी गरेका छन् । साथै, आफूले पीडितसँग माफी पनि मागेको उनले बताए । फोन गरेर धम्काउने सबैले वडाध्यक्ष कार्कीकै नाम लिएको पीडितको भनाइ छ । मावलीको हजुरबुवा–हजुरआमालाई पनि धम्की आएको पीडित बस्नेत बताउँछिन् । ‘मेरो मामाघरमासमेत फोन गरेर धम्काइएको छ । बुवा प्रेसरको रोगी, यिनीहरूले दिएको दबाबका कारण बेहोस् भएर ढल्नुभएछ । 

बज्रपातमाथि बज्रपात 

गाउँमा खान–बस्नकै दुःख भएपछि राजधानी छिरेकी बस्नेतमाथि आइपरेको बज्रपात सानो छैन । २०७२ सालको महाभूकम्पले भत्काएको घर बनाउन लागेको ऋण तिर्न काठमाडौं आएकी उनले घरमा सहयोगीको रूपमा काम गर्न थालिन् । त्यहींबाट उनको जीविकोपार्जन, भाइबहिनीको पढाइ र घरखर्च चलिरहेको थियो । यहीं हुँदा विवाह भयो । भखरै २४ वर्ष लागेकी बस्नेतको वैवाहिक जीवन सुखद् रहेन । श्रीमान्ले कहिल्यै आफ्नो घर लगेनन् । मावलको घरमा लगेर राखिदिए । श्रीमान् हुनुको एउटा पनि कर्तव्य पूरा नगरेपछि सम्बन्धविच्छेदको निर्णय गरिन् । हाल सो मुद्दा चलिरहेको छ । एक्लै बस्दै आएकी छन् । मानसिक तनाव खेपिरहेकी उनीविरुद्ध उच्च अदालत, पाटनमा हनीट्रयापलगायत अनेकौं मुद्दा हालिएको छ । हरिकुमार पोखरेलको तर्फबाट अधिवक्ता राधिका खतिवडा, कृष्णप्रसाद सापकोटालगायतले मुद्दा लडिरहेका छन् ।