नेपालगञ्ज गएका रेशम भैरहवाबाट उडे, भारतबाट काँग्रेस नेता कोइराला

जेठ १५ गते गणतन्त्र दिवसको दिन बिहान सदरखोर डिल्लीबजारबाट छुटेका रेशम चौधरी गृहजिल्लालगायत लुम्बिनी प्रदेश घुमेर हिजो राजधानी फर्केका छन् । टीकापुर नरसंहारमा संलग्न भएको आरोपमा जन्मकैद भुक्तान गरिरहेका नागरिक उन्मुक्ति पार्टीका संरक्षक रेशमलाई सरकारको सिफारिसमा राष्ट्रपति रामचन्द्र पौडेलले आममाफी दिनुभएको थियो ।

उनी सोही दिन काठमाडौंबाट नेपालगञ्ज हुँदै कैलाली पुगेका थिए । एक साता लामो घुमघाम र भेटघाटपछि उनी हिजो भैरहवाबाट काठमाडौं आएका हुन् । उनी हिजो राति १० बजे बुद्ध एअरको उडानमा आइपुगेको बताइन्छ । 

यता, नेपाली काँग्रेसका नेता शेखर कोइराला नयाँ दिल्लीबाट स्वदेश फर्केका छन् । उनी नेपाल वायुसेवाको उडान नम्बर आरए २१८ मा राति १० बजे काठमाडौं आइपुगेका हुन् ।

प्रधानमन्त्री कार्यालयका सचिव विनोदप्रकाश सिंह आज बिहान टर्कि गएका छन् । उनी टर्किस एअरलाइन्सको उडान नम्बर टीके ७२७ मा बिहान सवा ८ बजे इस्तानबुलतर्फ प्रस्थान गरेका हुन् ।