नयाँ दिल्लीको सडकमा जर्मन दूतावासका कर्मचारीहरु कम्मर मर्काउँदै

भारतको राजधानी नयाँ दिल्लीस्थित जर्मन दूतावासले भारतीय चर्चित चलचित्र ‘आरआरआर’ को गीत ‘नाटुनाटु’ मा नाचिएको दृश्य आफ्नो सामाजिक सञ्जालमा पोष्ट गरेको छ । 

अन्तरदूतावास प्रतियोगितामा सहभागी हुन दूतावासले उक्त गीतमा थुप्रैलाई नचाएर भिडियो बनाएको बताइएको छ । ओस्कर अवार्ड विजयी चलचित्रको गीत सामाजिक सञ्जालमा पोष्ट गरेको लगत्तै भाइरल बनेको छ । 

पूरानो दिल्लीको चाँदनी चोकमा खिचिएको भिडियोलाई भारत र भुटानका लागि जर्मन राजदूत फिलिप एकरम्यानले पोष्ट गरेका हुन् । भिडियोमा भारतीय र जर्मनहरु मस्तसँग नाचिरहेका देखिन्छन् ।

राजदूत फिलिपले क्याप्सन लेखेका छन्, ‘जर्मनहरु नाच्न सक्दैनन् ? म र मेरो इन्डो–जर्मन टोलीले पूरानो दिल्लीमा, ओस्करमा नाटुनाटुको जीत मनायौं । एकदमै खुशी लाग्यो । हामीलाई प्रेरणा दिनुभएकोमा भारतमा रहेको कोरियाली दूतावासलाई धन्यवाद । रामचरण र आरआरको टोलीलाई बधाई ।’

यता, भारतीय प्रधानमन्त्री नरेन्द्र मोदीले जर्मन राजदूतको उक्त पोष्टको जवाफ ट्वीटरमार्फत् दिएका छन् । उनले जर्मनहरु राम्रोसँग नाच्न सक्ने उल्लेख गर्दै लेखेका, ‘भारतको रंग र स्वाद ! जर्मनहरु पक्कै पनि राम्रोसँग नाच्न सक्छन् ।’

कोरियाली दूतावासले यस्तै भिडियो बनाएको एक सातापछि जर्मन दूतावासले भिडियो अपलोड गरेको हो ।

गत फेब्रुअरी २६ मा भिडियो पोष्ट गर्दै कोरियाली दूतावासले भनेको थियो, ‘नाटु नाटु, आरआर डान्स कभर ।’ आरआरको उक्त गीतले ओस्कर जितेपछि अहिले विश्वभर लोकप्रियता पाएको छ ।