हिँड्दा हिँड्दै सशस्त्रका होनहारको प्राणान्त
सशस्त्र प्रहरी बलका एक जना योगी इन्सपेक्टर हिजो अपरान्ह हिँड्दा हिँड्दै सडकमा ढलेर बितेका छन् । बलका ब्याण्ड गुल्म इञ्चार्ज तीर्थ छटुङ्गेलको भक्तपुर राधेराधे नजिकै ज्यान गएको हो ।
सडकको सिसीटिभी फुटेजमा उनी हिँडिरहेको अवस्थामा लल्याकलुलुक भएर ढलेको देखिन्छन् । हिँडेका तीर्थ के कारणले ढले र ढल्नेबित्तिक्कै कसरी बिते भन्ने सम्बन्धमा सशस्त्र प्रहरी र अस्पतालका चिकित्सकहरु पनि अनभिज्ञ देखिएका छन् ।
भक्तपुरको थिमीस्थित राधेराधे नजिकै भाटभटेनीको गल्लीमा उनी ढलेका हुन् । लगत्तै मध्यपुर अस्पताल पुर्याए पनि उनलाई चिकित्सकले मृत घोषणा गरिदिएका थिए । सडकमा ढलेपछि सोही स्थानमा हिँडिरहेकी महिलाले उनलाई ट्याक्सीमा हालेर अस्पताल पुर्याएकी थिइन् ।
उनी काठमाडौंको सीतापाइलामा परिवारसहित बस्दै आएका थिए । हिजो अपरान्हतिर राधेराधे नजिकैको गल्लीमा पैदल गएको र फर्कंदा लडेको पाइएको हो । तर उनी कहाँ पुगेर फर्केका थिए भन्नेबारे अनुसन्धान भइरहेको स्रोतको दाबी छ ।
‘ड्युटी हल्चोक,बसाई सीतापाइला, ढलेको राधेराधे नजिकै भएकाले शंका गर्नुपर्ने देखिन्छ । उनलाई सुगर,प्रेसरको समस्या पनि रहेको आशंका छ,’ परिवारलाई उद्धृत गर्दै स्रोतले बतायो । तीर्थले इन्सपेक्टरको तालिम भर्खर सकाएका थिए । दुई दशक बढी सेवा गरेका उनी अनुभवी कर्मचारीको रुपमा परिचित थिए ।
हिजो निधन भएका उनको केएमसी अस्पताल भक्तपुरमा पोष्टमार्टम गरेर आजै अन्त्येष्टि गरिने सशस्त्रले जनाएको छ ।
| यो पनि... 1. कोशी प्रदेश विरोधीहरु फेरि सडकमा |
ट्रेन्डिङ पोस्ट
टिप्पणीहरू