प्रसूति तयारीका लागि एक महिना अगाडि नै बिदा दिन माग

एकीकृत सरकारी कर्मचारी संगठनले महिला कर्मचारीहरुलाई प्रसूति तयारीका लागि एक महिना पहिले बिदा दिनुपर्ने माग राखेको छ । 

फागुन २६ र २७ गते सम्पन्न संगठनको प्रथम अधिवेशनबाट निर्वाचित महासचिव प्रकाश राईले आज विज्ञप्ति जारी गर्दै यस्तो माग गरेका हुन् । उनले महिला कर्मचारीहरुलाई प्रसूति तयारीका लागि एक महिना बिदा दिनुका साथै कार्यालयमा स्तनपान कक्षको समुचित व्यवस्था गरिनुपर्ने माग पनि राखेका छन् ।  

त्यस्तै, टेस्टट्युब बेवीको निम्ति लामो समयसम्म अस्पतालमा निगरानीमा रहनुपर्ने र आराम गर्नुपर्ने भएकाले तलबी बिदाको व्यवस्था मिलाउनुपर्नेमा कर्मचारी संगठनले जोड दिएको छ । संगठनले अस्थायी/करार कर्मचारीलाई सामाजिक सुरक्षा कोषमा सहभागी गराउनुका साथै हुलाकमा कार्यरत करारका कर्मचारीलाई विभेद नगर्नसमेत भनेको छ । 

साथै, कर्मचारी समायोजनले कर्मचारीहरु संघ, प्रदेश र स्थानीय तहमा विभाजन भएको भन्दै सबैलाई समेट्न एकीकृत संगठन संरचनाको व्यवस्था, संघीय निजामती सेवा ऐनको व्यवस्था, वैज्ञानिक सरुवा प्रणाली सञ्चालनदेखि क्षतिपूर्तिसहितको सार्वजनिक सेवाको मागसमेत गरिएको छ ।