रंगेहात पक्राउ परेका जनप्रतिनिधि दोषी ठहर, गाउँपालिकाका अध्यक्ष भन्छन् ‘षड्यन्त्र गरेर फसाइयो’

बागलुङको निसीखोला गाउँपालिकाका अध्यक्ष सूर्यबहादुर घर्ति लागूऔषध गाँजा–चरेससम्बन्धी मुद्दामा दोषी ठहर भएका छन् । जिल्ला अदालत बागलुङका न्यायाधीश दिवाकर भट्टको इजालसले घर्तिमाथि लागेको मुद्दामा कसूर ठहर गर्दै सजाय निर्धारणको लागि पेस गर्न आदेश दिएको जिल्ला प्रहरी कार्यालय, बागलुङका प्रहरी उपरीक्षक (एसपी) दयानिधि ज्ञवालीले बताए । अध्यक्षलाई २ देखि १० वर्षसम्मको सजाय हुनसक्ने उनले जानकारी दिए ।
 
अध्यक्ष घर्तिले भने कसूर अस्वीकार गरेका छन् । उनले केही मानिसले आफूलाई षड्यन्त्र गरेर फसाएको दाबी गरे । भने, ‘मध्यराति मेरो घरको वरपर लागूऔषध प्याँकियो र मलाई फसाइयो ।’निसीखोला गाउँपालिका–६ का तत्कालीन वडाध्यक्ष घर्तिमाथि २०७७ असार १२ गते आफ्नै घरमा अवैध लागूऔषध राखेको आरोप लागेको थियो । प्रहरीले उनको घरबाट ८० केजी गाँजा धुलो पारिएको अवस्थामा बरामद गरेको थियो । 

बुर्तिवाङ बजारमा गाँजा खाने युवालाई समात्ने क्रममा ‘सप्लाइ’ गर्ने व्यक्तिको खोजी गर्दै जाँदा प्रहरी अध्यक्ष घर्तिको घरसम्म पुगेको बताइएको छ । उक्त घटनामा जिल्ला प्रहरी कार्यालय बागलुङले २०७७ भदौ ४ गते जिल्ला अदालत बागलुङमा लागुऔषधसम्बन्धी कसूरमा मुद्दा दर्ता गराएको थियो ।