पटक पटक कूल पूजा रोकिएपछि बली नदिई बोकालाई घण्टी बाँधेर छाडियो

काभ्रेको पनौती–कुशादेवी क्षेत्रका आचार्य बन्धुहरुले कूलपूजाको क्रममा बली नदिने भएका छन् । अघिल्लो बर्ष नै धान्यपूर्णिमामा हुनुपर्ने कूल पूजाका लागि किनिएको बोकालाई उक्त समयमा सुतक परेका कारण पूजा रोकिएपछि बली नदिएको बताइन्छ ।

सोही बोकालाई जेठमा बली दिने तयारी हुँदै गर्दा जुठो परेकाले पुनः कूलपूजा रोकिएको थियो ।  पटक पटक पूजा छेकिएपछि आज कूलपूजाको क्रममा बली दिन पनौती ६ स्थित मन्दिरमा लगिएको बोकालाई बली नदिई घण्टी बाँधेर छाडिएको छ।

एक सय ५० भन्दा बढी घरधुरी भएका आचार्य बन्धुहरुले अबदेखि कूलपूजामा बली नदिने र नरिवल चढाउने निर्णय गर्दै बोकाको घाँटीमा घण्टी बाँधेर छाडिदिएको स्थानीय करण आचार्यले जनआस्थालाई  बताए ।