कन्सल्टेन्सी सञ्चालक नै सर्वसाधारण ठग्ने धन्दामा सक्रिय

सर्वसाधारणलाई बेलायत, अमेरिकालगायत आकर्षक रोजगारी भएका मुलुक पठाइदिने प्रलोभनमा पारेर ठग्दै आएका एउटा कन्सल्टेन्सीका सञ्चालकलाई प्रहरीले नियन्त्रणमा लिएको छ । पुतलीसडकस्थित रेडजोन फाउन्डेसन कन्सलटेन्सी सञ्चालन गर्दै आएका तिलकबहादुर बस्नेतलाई सर्वसाधारण ठगेको आरोपमा प्रहरीले पक्रेको छ ।

पीडितहरुलाई अमेरिका, बेलायतलगायतका देशको भीसा उपलब्ध गराइदिने प्रलोभनमा ११ लाख २० हजार ठगेको उजुरीपछि बस्नेत पक्राउ परेका हुन् । बस्नेतको कन्सलटेन्सीले शिक्षा, विज्ञान तथा प्रविधि मन्त्रालयबाट अनुमति नलिएको समेत यथार्थ खुलेको छ । 

सोलुखुम्बु स्थायी घर भएका र हाल मैतीदेवीमा बस्दै आएका ३३ वर्षे बस्नेतलाई हिजो पुतलीसडकबाट पक्राउ गरिएको प्रहरीले जनाएको छ । थप अनुसन्धान र आवश्यक कारवाहीको निम्ति उनलाई जिल्ला प्रहरी कार्यालय परिसर टेकु पठाइएको छ ।