भीम रावललाई पनि भारतीय गुप्तचर संस्था ‘रअ’ सँग मुछियो

एमाले उपाध्यक्ष भीम रावलले आफूले भारतीय गुप्तचर संस्था ‘रअ’ का प्रतिनिधिसँग नभेटेको बताउनुभएको छ । एउटा न्यूज पोर्टलमा रावलले असार २० गते साँझ ८ बजेदेखि ९ बजेसम्म होटल मेरियटमा भेटघाट गरेको भनेर लेखिएको समाचारलाई उहाँले ‘कथित’ भन्नुभएको छ ।

रावलले आज जारी गर्नुभएको प्रेस वक्तव्यमा भनिएको छ, ‘त्यो दिन साँझ म र रघुजी पन्त माधवकुमार नेपालजीको निवासमा थियौं । हामीले कुरा गरिरहेको समयमा विष्णुप्रसाद पौडेलको फोन आयो । उहाँको फोन आएको कुरा दुबै जनालाई जानकारी गराएँ । विष्णुजीले बालुवाटारमा प्रधानमन्त्रीले कुरा गर्न खोज्नुभएको छ भन्नुभएपछि मैले माधव नेपालजी र रघुजीले सुन्नेगरी फोन खुल्ला राखेँ ।’त्यसपछि आफू टोखास्थित घर गएर खाना खाइवरी बालुवाटारमा भेटघाटको लागि आउँदा साँझको सवा ८ बजेको तथ्यलाई बंग्याएर आफ्नो देशभक्ति र जनताप्रतिको समर्पित जीवन आदर्शमाथि आक्रमण गर्ने घृणित प्रपञ्च रचिएको भन्नुभएको छ ।

मनगढन्ते तरिकाले भारतीय गुप्तचर संस्थासँग रावललाई जोडेर समाचार प्रकाशित गर्ने न्यूज पोर्टलको नाम र नेताहरुको नाम उल्लेख नगरी उहाँले जारी गर्नुभएको वक्तव्यमा बालुवाटारमा त्यसपछि प्रधानमन्त्री केपी ओलीसँग कार्यदलमा आफ्नो संलग्नताबारे मात्र कुरा भएको उल्लेख गर्नुभएको छ ।

वरिष्ठ नेता नेपालको निवासमा असार २० गते साँझ भएको कुरा उहाँ र पन्तलाई मात्र थाहा भएको र बालुवाटार गएको कुरो प्रधानमन्त्री र पौडेललाई मात्र थाहा भएको यथार्थलाई मनगढन्ते तरिकाले कसले प्रचार गर्यो भनेर उहाँले आश्चर्य व्यक्त गर्नुभएको छ ।

पद र प्रतिष्ठाको लागि वाह्य शक्तिका सामु घुँडा टेक्दै देशलाई संकटतर्फ धकेल्नेहरुले नै आफ्नो विरुद्ध उक्त प्रकारको झुठो प्रचार गरेको बताउँदै रावलले लेख्नुभएको छ, ‘केपी ओलीले आफूलाई कार्यवाहक अध्यक्ष बनाउने प्रस्ताव गरेकाले म नरम भएको भन्ने कपोलकल्पित समाचार छापेको देख्दा यो सुनियोजित षडयन्त्रपूर्ण कुप्रचार भएको स्पष्ट हुन्छ ।’