सर्वोच्चलाई जवाफै नदिई मन्त्रिपरिषद बिस्तार

अघिल्लो मन्त्रिपरिषद पुनर्गठनका बिरुध्द सर्वोच्च अदालतमा परेको मुध्दामा लिखित जवाफ पेश नगरी प्रधानमन्त्री केपी शर्मा ओलीले फेरि मन्त्रीमण्डल बिस्तारको तयारी गर्नुभएको छ ।

प्रधानमन्त्री ओलीले अस्ति २१ गते जसपाको महन्थ खेमालाई समेटेर मन्त्रिमण्डल पुनर्गठन गर्नुभएको थियो । प्रतिनिधिसभा बिघटन गरेर निर्वाचन घोषणा गरेको अवस्थामा कामचलाउमा परिणत भएको सरकारले गरेको मन्त्रिपरिषद बिस्तार असंवैधानिक भएको भन्दै सर्वोच्च अदालतमा रिट परेको थियो । उक्त रिटमाथि सुनुवाई गर्दै सर्वोच्चले १५ दिनभित्र लिखित जवाफ पेश गर्न सरकारलाई आदेश दिएको छ ।

सरकारले अहिलेसम्म अदालतलाई लिखित जवाफ पेश गरेको छैन । तर,आदेश आएको दुई दिन नबित्दै मन्त्रिपरिषद बिस्तार गर्न लागिएको हो ।

स्रोतका अनुसार आज नियुक्त हुन लागेका मन्त्रीहरुमा अधिकांश नयाँ अनुहार छन् । बताइएअनुसार माओवादी परित्याग गरी एमाले प्रवेश गरेका पूर्वगृहमन्त्री रामबहादुर थापा बादलकी पत्नी नैनकला थापालाई महत्वपूर्ण मन्त्रालयको जिम्मेवारी दिने तयारी छ । थापालाई: सन्चार तथा सूचना प्रविधिमन्त्रीमा नियुक्त गर्न लागिएको बुझिएको छ ।

त्यस्तै गृहमन्त्रीमा खगराज अधिकारी कन्फर्म भएको बताइएको छ । यसअघि महेश बस्नेतको समेत गृहमन्त्रीमा चर्चा थियो । बस्नेतलाई ल्याउँदा गोकुल छुट्ने भएपछि प्रधानमन्त्रीको दोस्रो रोजाइका अधिकारीलाई गृहको जिम्मा दिन लागिएको स्रोतले बताएको छ ।

यता ईश्वर पोखरेलले सम्हाल्दै आएको प्रधानमन्त्री कार्यालय हेर्ने बिना विभागीयमा मोहन बानियाँलाई ल्याउन लागिएको बुझिएको छ । माधव नेपाल पक्ष छाडेर ओलीतिर लागेका गणेश पहाडीलाई सामान्य प्रशासनमन्त्री बनाउन लागिएको छ ।

त्यस्तै,कृषिमन्त्रीमा ज्वालाकुमारी साह, बनमन्त्रीमा नारदमुनी राना, उद्योगमन्त्रीमा राजकिशोर यादव, सामान्य प्रशासनमन्त्रीमा गणेश पहाडी र वन राज्यमन्त्रीमा आशा बिक नियुक्त हुन लागेको बताइएको छ ।