जसको सरकार आए पनि चीनलाई फरक नपर्ने

नेपाल भ्रमणमा रहेका चिनियाँ जनकंग्रेसका अध्यक्ष लि चान्सुले नेपालमा हुने सरकार परिवर्तनले दुई देशबीचको सम्बन्धमा कुनै फरक नपर्ने बताउनुभएको छ । आज नयाँ बानेश्वरस्थित संसद भवनमा प्रमुख प्रतिपक्ष दल एमाले अध्यक्ष केपी शर्मा ओलीसँगको भेटवार्ताका क्रममा उहाँले यस्तो बताउनुभएको हो ।

अध्यक्ष लिले नेपालमा हुन गइरहेको आम निर्वाचन सफलतापूर्वक सम्पन्न गर्न शुभकामना दिँदै निर्वाचनपछि बन्ने सरकारलाई चीनको पूर्ण समर्थन रहने बताउनुभएको भेटमा सहभागी एमाले नेता बिष्णु रिजालले जानकारी दिए ।

त्यसअघि ओलीले आफ्नो पालामा नेपाल–चीन सम्बन्धलाई रणनीतिक साझेदारीमा विकास गर्न महत्वपूर्ण काम भएकाले त्यसको अपेक्षित लाभ हासिल हुने आशा गरेको बताउनुभएको थियो । चिनियाँ नेता लिले भने जसको सरकार आए पनि चीनको समर्थन यथावत रहने कूटनीतिक जवाफ दिनुभएको बताइएको छ ।

आजै राष्ट्रियसभाका अध्यक्ष गणेश तिमिल्सिना र माओवादी केन्द्रका अध्यक्ष प्रचण्डसँग भेटघाट गर्नुभएका लिले आजै प्रधानमन्त्री शेरबहादुर देउवा र परराष्ट्र मन्त्री नारायण खड्कासँग पनि भेट्ने कार्यक्रम छ ।

सभामुख अग्निप्रसाद सापकोटाको मैत्रीपूर्ण निमन्त्रणामा हिजो अपरान्ह काठमाडौँ उत्रिनुभएका लि हिजैदेखि उच्चस्तरीय भेटघाटमा व्यस्त हुनुहुन्छ । हिजो उहाँले सभामुख सापकोटासँग संसद भवनमा शिष्टाचार भेट गर्नुभएको थियो । सो क्रममा ६ बुँदे सम्झौतामा हस्ताक्षरसमेत गरिएको थियो ।

भोलि बिहान राष्ट्रपति विद्यादेवी भण्डारीलाई भेटेर अध्यक्ष लि पर्सि बिहान ९ बजे कोरियातर्फ लाग्नुहुने छ ।