७४ वर्षीय वृद्ध बलात्कारी अदालतमा, मान्छे मारेर भागेका गैरे हिरासतमा

जबरजस्ती करणीको मुद्दामा अदालतले दोषी ठहर गरेका ७४ वर्षका चेतनाथ डल्लाकोटीलाई चितवन प्रहरीले पक्राउ गरेको छ । राप्ती नगरपालिका – ७ भन्डाराबाट उनलाई हिजो पक्राउ गरिएको हो ।

डल्लाकोटीले अदालतको फैसलाअनुसार बलात्कारको मुद्दामा ९ वर्ष कैद र एक लाख क्षतिपूर्ति सजाय भुक्तान गर्न बाँकी छ । चितवन जिल्ला अदालतको ०७६ माघ ९ गते र उच्च अदालत पाटन हेटौडाको ०७७ चैत १२ गतेको फैसलाले उनलाई उक्त सजाय तोकेको हो । डल्लाकोटीलाई अदालतको उक्त फैसलाअनुसारको कैद तथा क्षतिपूर्ति भुक्तानको लागि प्रहरीले अदालतमा उपस्थित गराएको छ ।

त्यसैगरी चितवन प्रहरीले मान्छे मारेर भागेका अर्का एक व्यक्तिलाई चार महिनापछि समातेको छ । भरतपुर महानगरपालिका -७ का अनिल परियारलाई धारिलो हतियार प्रहार गरी हत्या गरेर भागेका स्थानीय ३२ वर्षीय तिलक गैरेलाई प्रहरीले भदौ २३ गते पक्रेको हो ।

गत वैशाख २५ गते परियारको हत्या गरेको आरोप लागेका गैरे त्यसयता फरार थिए । उनलाई लुकिछिपी बसेको अवस्थामा जिल्ला प्रहरी कार्यालय रुपन्देहीको सहयोगमा सिद्धार्थनगर नगरपालिका-१ बेलहियाबाट पक्राउ गरिएको चितवन प्रहरीले जनाएको छ ।

हत्या अभियोगमा पक्राउ परेका गैरेलाई थप अनुसन्धानको लागि चितवन अदालतको आदेशअनुसार हिजो कारागार पठाइएको छ ।