काठमाडौंबाट जापान उडानको भाडा डेढ लाखबढी

नेपाल वायुसेवा निगमले तोकिएको भन्दा बढी भाडा लिने ट्राभल एजेन्सीलाई कारवाही गर्ने बताएको छ । काठमाडौंबाट जापानको नारिता सहरमा सातामा दुई उडान गर्दै आएको निगमले आगामी आइतबारदेखि तीन उडान गर्न लागेको जानकारी गराएको हो ।

नारिताकालागि अब आइतबार, मंगलबार र शुक्रबार उडान हुनेछ । जापान सरकारले लगाएको पछिल्लो नियमानुसार आइतबार र मंगलबार १ सय ४० तथा शुक्रबार १ सय २० यात्रु मात्र बोक्न पाइन्छ । निगमले जारी गरेको विज्ञप्तिमा यात्रुको चाप र मागको तुलनामा सिटको उपलब्धता न्यून रहेकाले भाडादर महँगो भएको दाबी गरिएको हो ।काठमाण्डौं नारिता सेक्टरमा करसहित बिजनेश क्लासमा एक लाख ५२ हजार तथा इकोनोमी क्लासमा एक लाख १९ हजार भाडादर कायम गरिएको छ । निगमले तोकेकोभन्दा बढी मूल्यम टिकट बिक्री गरेको गुनासो आएकाले त्यस्तो पाइएमा नियमअनुसार कारवाही हुने बताइएको छ । यात्रुहरुले बढी भाडा तिरेको भए प्रमाणसहित उजुरी गर्न आग्रह गरिएको छ ।