पुस ११ देखि १३ सम्म सौराहामा हात्ती महोत्सव

चितवनको पर्यटकीय नगरी सौराहामा वर्षेनी हुँदै आइरहेको ‘हात्ती तथा पर्यटन महोत्सव’ मा हात्तीमाथि हुने क्रुर व्यवहार रोक्न कडा मापदण्ड बनाइएको छ । यो वर्ष हुन गइरहेको महोत्सवमा हात्तीमाथि कुनै पनि क्रुर व्यवहार गर्न नपाइने मापदण्ड बनाइएको आयोजक क्षेत्रीय होटल संघ चितवनले जानकारी दिएको छ । 

चितवनलाई विश्वसामु परिचित गराउन सौराहामा विगत दुई दशकदेखि हात्ती महोत्सव हुँदै आइरहेको छ । सोहीअनुरुप आउँदो पुस ११ गतेदेखि १३ गतेसम्म १९ औं हात्ती महोत्सव हुँदैछ । तर, महोत्सवमा हात्तीमाथि क्रुर व्यवहार गर्ने गरिएको भन्दै विश्वव्यापी रुपमा आलोचना हुने गरिएको छ । त्यसप्रति सजग रहँदै आयोजक संघले सरोकारवाला निकायसँगको सहकार्यमा यो वर्ष हुने महोत्सवका निम्ति विभिन्न मापदण्ड बनाएको छ । 

संघले आज पत्रकार सम्मेलन गरेर यो वर्ष हात्ती महोत्सवमा धारिलो वा हानिकारक उपकरण प्रयोग निषेध गरिएको जानकारी गराएको छ । त्यस्तै, सबै हात्तीलाई प्रतियोगिता अघि र पछि पशु चिकित्सकले परीक्षण गर्नुपर्ने, तालिमप्राप्त योग्य जनशक्ति (माहुते) मात्र महोत्सवमा सहभागी हुन पाउने नियम बनाइएको छ । 

‘यस महोत्सवमा हात्तीलाई पूर्ण जिम्मेवार व्यवहार गरिने स्थापित मापदण्ड अनुशरण गरी कुनै पनि क्रुर व्यवहार नगरिने जानकारी गराइन्छ,’ संघले भनेको छ, ‘हात्ती हाम्रो धर्म, संस्कृति र पर्यटनसँग जोडिएको छ । यसलाई हामीले आफ्नै सन्तानजस्तै गरेर पालेको हुँदा हामीलाई हात्तीको धेरै माया लाग्दछ ।’

संघले तीन दिने महोत्सवमा हुने विभिन्न गतिविधिबारे पनि जानकारी गराएको छ । महोत्सवमा विभिन्न जातजातिको सांस्कृतिक झाँकी प्रदर्शन, हात्ती श्रृंगारसहित विभिन्न प्रतियोगिता, हात्ती वनभोज, स्वास्थ्य शिविर, पालिकास्तरीय डुंगा दौड प्रतियोगिता, हात्तीको महत्त्वसम्बन्धी विद्यालयस्तरीय वक्तृत्वकला प्रतियोगिता, सांस्कृतिकलगायत कार्यक्रम हुनेछन् । 

त्यस्तै, सफारी टुरिजम प्रवर्द्धनका लागि महोत्सवमा सहभागी हुने पाहुनालाई हात्ती सफारी, जीप सफारी, डुंगा सफारी, पैदल वनयात्रा गराउनेसमेत संघले जनाएको छ । संघका अनुसार महोत्सवमा कुल ८० वटा हात्ती सहभागी हुनेछन् । ती हात्तीले महोत्सव अवधिमा शोभा यात्रा गर्नेछन् । 

पर्यटन प्रवर्द्धनका निम्ति हुन गइरहेको महोत्सवमा सहभागी हुन आउने स्वदेशी तथा विदेशी पर्यटकलाई आयोजक संघ र रेवान सौराहामा आबद्ध सदस्यहरुको होटल, रेष्टुरेण्टमा खाना र आवसमा दश प्रतिशत छुटको व्यवस्थासमेत गरिएको छ ।