एउटा देशको दुर्गन्धबाट अर्को मुलुकका नागरिक पीडित

सिंगापुरको उत्तरपूर्वी क्षेत्रमा रहेको पुङ्गगोललगायतका बस्तीका स्थानीयले पछिल्ला वर्षहरूमा मलेसियाको जोहोरस्थित पासिर गुदाङ औद्योगिक क्षेत्रबाट आउने धुवाँ र रासायनिक दुर्गन्धका कारण हैरान भएको जनाउँदै सरकारसमक्ष उजुर गरेका छन् ।

सन् २०२१ मा पुङ्गगोलस्थित आफ्नै अपार्टमेन्टमा सरेकी ४२ वर्षीया क्रिस्टिन लीले पहिलो पटक चार वर्षअघि त्यहाँको हावामा आफूूले ‘तेजाब झैँ पोल्ने दुर्गन्ध’ महशुस गरेको बताइन् । ‘कहिलेकाहीँ त्यो गन्ध हप्तौं र महिनौंसम्म रहिरहन्छ। सुरुमा त बान्ता हुनेगरी दुर्गन्ध आउँथ्यो,’ उनले भनिन्। उनका अनुसार ‘कहिले पोल्ने रासायनिक गन्ध र कहिले जलेको जस्तो धुवाँको गन्ध ।’

लगातारको गन्ध र प्रदूषणका कारण उनले आफ्नो घरमा एयरकन्डिसन र पंखा जडान गरेकी छन् । ‘दुषित हावा भित्र नआओस् भनेर हामी प्रायः झ्याल बन्द राख्छौं,’ उनले भनिन् । 

स्थानीय बासिन्दाहरूका अनुसार, जोहोर बाह्रुस्थित पासिर गुदाङ क्षेत्रमा रहेका रासायनिक तथा पेट्रोकेमिकल उद्योगहरूबाट निस्किने धुवाँ र ग्यास सिंगापुरतर्फ बग्ने हावासँगै आइपुग्छ । यसले केवल पुङ्गगोल मात्र होइन, आसपासका अन्य आवासीय क्षेत्रमा पनि असर पारिरहेको छ।

साउथ चाइना मर्निङ पोष्टका अनुसार मलेसिया र सिंगापुरका वातावरणीय निकायहरूले त्यसबारे अनुगमन र वार्ता गर्दै आएका छन् । तरपनि गम्भीर वातावरणीय समस्या स्थायी रूपमा समाधान हुन नसकेको स्थानीयको भनाई छ । उनीहरुले सरकारसँग ‘सीमापार प्रदूषण नियन्त्रणका लागि ठोस कदम’ लिन आग्रह गर्दै आएका छन्।