पक्राउ परेका सबै ‘जेन–जी’ उमेर समूहका

भदाै २४ गतेकाे जेन जी विध्वंशमा अराजक गतिविधिमा संलग्न चार जना युवक पक्राउ परेका छन्। पक्राउ परेका सबैको उमेर २० देखि २७ वर्षभित्रको रहेको प्रहरीले जनाएको छ । याे उमेरलाइ ‘जेन–जी’ उमेर समूह भनिन्छ ।

प्रहरीका अनुसार, काठमाडौं चन्द्रागिरी–१२ बलम्बुका २० वर्षीय तीर्थमान तामाङ, बानेश्वरका २७ वर्षीय भुवन शाही, सुकेधाराका २२ वर्षीय अलिष श्रेष्ठ र मनमैजुका २७ वर्षीय सौरभ तामाङलाई नियन्त्रणमा लिइएको हो।

यी सबै आगजनी, लुटपाट, तोडफोड र हत्याजस्ता अपराधमा संलग्न भएको प्रहरी अनुसन्धानमा खुलेको छ।

तीर्थमानले प्रहरी प्रभाग बलम्बुमा आगजनी र तोडफोड गरेको, अलिष र सौरभले प्रहरी जवान उत्तम थापाको हत्या र महाराजगञ्ज वृत्तमा आगजनी गरेको, र भुवनले गौशाला वृत्त र ग्लोबल कलेजमा लुटपाट गरेको पाइएको छ।

भुवन शाही पूर्वसैनिक हुन् । उनी २०७४ सालमा नेपाली सेनामा भर्ना भए पनि नक्कली चालक अनुमति पत्रको कारण २०७५ सालमा सेनाबाट बर्खास्त भएका थिए।

पक्राउ परेकामाथि थप अनुसन्धान भइरहेको काठमाडौं प्रहरीले जनाएको छ।