सिंहदरबार पुगेर सरकारलाई एमाले नेताको सुझाव

इलाममा पहिरोले जनधनको ठूलो क्षति पुर्याएपछि नेकपा एमालेका युवा नेता सुहाङ नेम्वाङले राहत प्याकेज उपलब्ध गराउन माग गरेका छन् । सिंहदरबार पुगेका नेम्वाङले गृहमन्त्री ओमप्रकाश अर्याल र ऊर्जा, जलस्रोत तथा भौतिक पूर्वाधार निर्माणमन्त्री कुलमान घिसिङलाई भेटेर यस्तो माग गरेका हुन् । 

इलाम–२, का निवर्तमान सांसद सुहाङले दुई मन्त्रीसहित राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख दिनेशप्रसाद भट्टलाई पनि भेटेर इलाम पहिरोले निम्त्याएको संकट, राहत र पुनःस्थापनाको योजनाबारे ध्यानाकर्षण गराएका छन् ।

त्यसक्रममा विगतदेखि अति आवश्यक भूगर्भविद्लाई सम्पूर्ण इलामको माटो परीक्षण गरी आउँदो समयमा यस्ता घटना नहोस् भन्ने सुनिश्चित गर्दै दिगो व्यवस्थापनका लागि अनुरोध गरिएको उनले बताए । ‘अहिलेको, पटक पटकको समस्याको समाधान, नागरिकको सुरक्षा र सेवाका निम्ति एकीकृत बस्तीका लागि पनि सोच बनाउने कुरा राखियो,’ सुहाङले भनेका छन् । 

पहिरोमा ज्यान गुमाएका सबै परिवारलाई क्षतिपूर्ति दिन, एक जना गुमाएको खण्डमा दुई लाख र एकभन्दा बढी मृत्यु भएमा थप प्रतिव्यक्ति एक लाख रुपैयाँका दरले क्षतिपूर्ति दिनुपर्ने उनको माग छ । अस्थायी व्यवस्थापनका लागि प्रभावितहरुलाई दुई किस्तामा रकम उपलब्ध गराउन, अवरुद्ध बाटो, पुल र विद्युत यथाशीघ्र सञ्चालनमा ल्याउन पनि माग गरिएको छ ।

सबै नागरिकलाई सुरक्षित स्थानमा बस्न, स्थानीय प्रशासनका निर्देशन पालना गर्न र सम्भावित जोखिम भएका क्षेत्रमा नजान अनुरोध गर्दै सुहाङले भनेका छन्, ‘यस कठिन घडीमा हामी सबै एकजुट भएर प्रभावित परिवारहरूलाई सहयोग र राहत पुगोस् भन्ने अपिल गर्दछु । इलामका प्रत्येक नागरिकको सुरक्षा, पुनःस्थापना र मनोबलका लागि म सम्बन्धित निकायहरूसँग निरन्तर समन्वयमा छु ।’

हालैको अविरल वर्षा पछिको बाढीपहिरोमा इलाममा मात्रै ३७ जनाले ज्यान गुमाएका छन् भने केही अझै बेपत्ता छन् ।