कुलमानसँग मिलेर काम गर्न हितेन्द्र तयार

अर्बौं बाँकी विद्युत वक्यौता उठाउन नेपाल विद्युत प्राधिकरणको बोर्ड बैठक डाक्ने तयारी भएको छ ।

कुलमान घिसिङले उर्जामन्त्रीको कार्यभार सम्हाल्दै वक्यौता उठाउनेसम्बन्धि पहिलो निर्णय गरेका थिए । सोही अनुसार चाँडै बोर्ड बैठक डाक्ने तयारीमा रहेको प्राधिकरणका कार्यकारी निर्देशक हितेन्द्रदेव शाक्यले जानकारी दिएका छन् । 

भोलि-पर्सिमा बैठक बसेर वक्यौता उठाउन चाल्ने कदमबारे निर्णय लिइने उनले स्पष्ट पारे । शाक्यले सरकारको निर्णय मानेरै अघि बढ्ने पनि बताएका छन् ।

‘वक्यौतासम्बन्धी जुन मन्त्रीज्यूको निर्णय छ । यसलाई हामीले कार्यानवयन गर्छौं । बोर्डले निर्णय गर्नासाथ वक्यौता उठाउन लाग्छौं’ , उनले भने, ‘बोर्डमा मन्त्रीज्यू नै अध्यक्ष भएकाले निर्णय भएर कार्यान्वयन अघि बढ्नेछ । भोली अथवा पर्सीमै बोर्ड बैठक बस्छ ।’ 

बैठकबाट निर्णय भएपछि वक्यौता उठाउन कुनै समस्या नहुने हितेन्द्रको भनाइ छ ।  कुलमान विद्युत प्राधिकरणको कार्यकारी निर्देशक भएको बेला पटकपटक विद्युत वक्यौता उठाउन उद्योगीको लाइन काट्दै आएका थिए । तर, तत्कालीन प्रधानमन्त्री केपी शर्मा ओलीले लाइन जोड्न निर्देशन दिएपछि यो विषय जटिल बन्दै आएको थियो ।

उद्योग तथा अन्य सार्वजनिक क्षेत्रले डेडिकेटेड तथा ट्रंकलाइनमार्फत प्रयोग गरेको विद्युतको जरिवानासहित करिव २५ अर्ब रुपैयाँ उठाउनुपर्ने कुलमान प्राधिकरणमा रहँदा हिसाब सुनाएका थिए ।

उद्योगीलाई लोडसेडिङको समयमा २४ घण्टा नै विद्युत प्रयोग दिइएको थियो । तर,प्रयोग नगरेको बिजुलीको समेत बिल आएको भनेर उनीहरुले पैसा तिर्न आनाकानी गर्दै आएका छन् । अघिल्लो केपी ओली सरकारका उर्जामन्त्री दिपक खड्काको समेत  उनीहरुलाई साथ थियो।