अनुदानको मल तीन हजारमा बिक्री, प्रतिबोरा २१ सय झ्वाम

किसानले पाउने अनुदानको मल कालोबजारी गरी अन्यत्र बिक्री गर्ने एक सञ्चालकलाई प्रहरीले पक्राउ गरेको छ । कपिलवस्तुको मायादेवी गाउँपालिका–५ का किसानका लागि आएको अनुदानको मल व्यापारीलाई बेचेपछि चेतना विकास सहकारी संस्था डुमराका सञ्चालक वशिष्ठ पाण्डेय पक्राउ परेका हुन् ।

एक महिनाअघि साल्ट ट्रेडिङ कर्पोरेसनबाट उक्त सहकारीले मायादेवी–५, बलुहवाका लागि १९७ बोरा रासायनिक मल ल्याएको थियो । तर किसानले आफूहरूको लागि आएको अनुदानको मल एक महिनासम्म नपाएपछि साउन ११ गते जिल्ला प्रशासन कार्यालय, कपिलवस्तुमा उजुरी दिएका थिए । प्रमुख जिल्ला अधिकारी दिलबहादुर तामाङले छानबिन गर्न र कालोबजारी गर्ने सहकारी सञ्चालकलाई कारबाही गर्न निर्देशन दिएपछि उनी प्रहरी खोरमा पुगेका हुन् ।

जिल्ला प्रहरी कार्यालयका प्रवक्ता डिएसपी रिपेन्द्र कुमार सिंहले सहकारी सञ्चालक पाण्डेयलाई अनुदानको मल हिनामिना गरेको उजुरीको आधारमा पक्राउ गरेको बताए । ‘हामी अनुसन्धानकै क्रममा छौँ, मुद्दा चलाउने तयारीमा छौँ,’ उनले भने ।

स्रोतका अनुसार, उक्त सहकारीले यसअघि पनि कृषि सामग्री कम्पनी लिमिटेड तौलिहवा र बहादुरगञ्जबाट किसानको लागि आएको अनुदानको मल दुरुपयोग गरेको थियो । हराएको १९७ बोरा युरिया मल भने बहादुरगञ्जकै एक प्लाइबोर्ड कम्पनीमा प्रतिबोरा तीन हजार रुपैयाँमा बिक्री गरेको पाइएको छ । सरकारले किसानका लागि प्रतिबोरा नौ सय रुपैयाँमा अनुदानको मल कोटा तोकेर उपलब्ध गराउँदै आएको छ ।