केटीकाण्डमा फरार पूर्व गभर्नर पक्राउ

मधेश प्रदेशका पूर्वप्रदेश प्रमुख राजेश अहिराज झा पक्राउ परेका छन् । कलिली युवतीलाई एअर होस्टेस बनाइदिने प्रलोभनमा जबरजस्ती करणी गरेको आरोप लागेका उनलाई प्रहरीले आज काठमाडौंबाट समातेको हो ।

जबरजस्ती करणीको जाहेरीपछि फरार अहिराज भारतमा लुकिछिपी बस्दै आएका थिए । हालै नेपाल छिरेका उनी काठमाडौंमा गोप्य रुपमा बसेको सूचनाको आधारमा प्रहरीले आज फेला पारेको बुझिएको छ । 

चैत २५ गते उनीविरूद्ध काठमाण्डौ जिल्ला अदालतबाट पक्राउ पुर्जी जारी भएकाे थियाे । त्यसअघि महिला आयोगमा यसवारे उजुरी परेको थियो ।

मधेसबाणी साप्ताहिकसम्बध्द अहिराज केपी ओलीको अघिल्लो प्रधानमन्त्रित्वकालमा तत्कालिन सञ्चार मन्त्री गोकुल बास्कोटाको सिफारिससहित २ नम्बर प्रदेशको गभर्नर नियुक्त भएका थिए ।

उनीमाथि काठमाडौँको बानेश्वरमा गत वर्ष जेठमा एक युवतीमाथि बलात्कार गरेको आरोपमा जाहेरी परेको हो । प्रहरीका अनुसार उनलाई आजै जिल्ला अदालत काठमाडौँमा उपस्थित गराएर ५ दिनको म्याद थप गरिएको छ । 

उता अहिराजले पनि ती महिलाविरुद्ध आपराधिक लाभसम्बन्धी कसुरमा जाहेरी दिएको बताइन्छ । गत चैत २५ गते प्रहरीले जिल्ला अदालत काठमाडौंबाट पक्राउ अनुमति लिएपछि उनी फरार थिए । 

अहिराज २०७७ फागुन ७ देखि २०७८ साउन ३२ सम्म मधेस प्रदेश प्रमुख थिए ।